Šviedskija piłoty atrymali premiju Chartyi'97
Tomas Mazeci, Hanna Frej i Per Kromveł sustrelisia z redaktarkaj charter97.org Natallaj Radzinaj ŭ šviedskim horadzie Malmio.
Šviedy stali łaŭreatami Nacyjanalnaj premii Chartyi'97 ŭ halinie abarony pravoŭ čałavieka za 2012 hod.
Ryzykujučy žyćciom, supracoŭniki šviedskaha rekłamnaha ahienctva Studio Total Tomas Mazeci, Hanna Frej i Per Kromveł ździejśnili palot u apošniuju dyktaturu Jeŭropy, kab simvalična padtrymać niezaležnych žurnalistaŭ, jakija pracujuć tam.
Biasstrašnaść šviedaŭ ŭzrušyła śviet. U luby momant ich maleńki lohkamatorny samalot mahli źbić i tady b šviedskija entuzijasty nieminuča zahinuli. Na ščaście, palot prajšoŭ udała. Zuchi skinuli nad Minskam i Iviancom sotni plušavych miedźviedzianiat z cydułkami «U padtrymku svabody słova ŭ Biełarusi».
Palacieli hałovy hienierałaŭ, było začyniena pasolstva Šviecyi ŭ Minsku. Pra Biełaruś zahavaryli viadučyja telekanały i haziety płaniety jak ab krainie, dzie bajacca navat plušavych miedźviedzianiataŭ.Mahutnaja sistema kantrolu nad krainaj, stvoranaja Łukašenkam, jak akazałasia, maje svaje słabiny.
Uručajučy premiju Mazeci, Freju i Kromvełu, Natalla Radzina adznačyła, što premija Chartyi'97 była zasnavana ŭ 1998 hodzie, i za 15 hadoŭ piłoty stali pieršymi zamiežnikami, jakija jaje atrymali za mužnaść, prajaŭlenuju ŭ baraćbie za pravy čałavieka ŭ Biełarusi.
Sami supracoŭniki rekłamnaha ahienctva Studio Total nie ličać siabie hierojami. «Heta vy hieroi ŭ Biełarusi, — skazali jany na sustrečy z redaktaram charter97.org. — My ryzykavali ŭsiaho hadzinu, a vy žyviacie pry dyktatury kožny dzień na praciahu amal 19 hadoŭ».
Takoje adčuvańnie, što jany da hetaha času nie ŭśviedamlajuć, što ich mahli zabić pry palocie ŭ Biełaruś.
Jak havaryłasia ŭ
Na pytańnie, čamu, u pieršuju čarhu, u padtrymku charter97.org, šviedy adkazvajuć kalektyŭna (Hanna, Tomas i Per naohuł na ŭsie pytańni imknucca adkazvać razam, jak byccam paćviardžajučy tym samym — jany adna kamanda): «Bo dla nas Chartyja'97 — heta simvał baraćby za svabodu słova, — kažuć jany. My naohuł spačatku chacieli skidać nad Biełaruśsiu haziety z praŭdzivymi navinami, naprykład, „Chartyju'97“, ale potym daviedalisia, što ŭ vas prachodzili akcyi pratestu ź miakkimi cackami i vyrašyli skinuć nad krainaj miedźviedzianiataŭ. My taksama šmat čytali pra vas, Natalla, i nas vielmi ŭraziła vaša historyja».
Ab budučych akcyjach u padtrymku demakratyi ŭ Biełarusi šviedy kažuć aściarožna: «My nie možam afišavać našy budučyja akcyi, ale nas chvalujuć losy biełarusaŭ», — kažuć jany.
Natalla Radzina nahadała Tomasu Mazeci, što ŭ vieraśni 2012 hoda jon zajaviŭ, što Łukašenka zastałosia trymać uładu ŭsiaho 14 miesiacaŭ.«Pa zakonach cykličnaha raźvićcia padziej, niešta ŭ Biełarusi pavinna adbycca viasnoj, a vosieńniu ŭłada Łukašenka vielmi mocna pachiśniecca», — upeŭnieny šviedski piłot.