Pakistanskaja dziaŭčynka-błohier, u jakuju stralali taliby, prajšła apieracyju pa rekanstrukcyi čerapa

Pakistanskaja školnica-błohier Małała Jusafzaj, jakuju sprabavali zabić taliby, paśpiachova prajšła apieracyju pa rekanstrukcyi čerapa i adnaŭleńni słychu,

piša The Guardian.

U levuju častku čerapa dziaŭčynki ŭžyŭlenyja tytanavaja płaścina i kachlearny impłantant (hety prybor stymuluje elektryčnymi impulsami vałokny słychavoha nierva i dazvalaje častkova adnavić słych). Miedyki spadziajucca, što ciapier Jusafzaj bolš nie spatrebiacca apieracyi.

«Jaje stan stabilny, i daktary vielmi zadavolenyja tym, jak prasoŭvajecca lačeńnie. Jana ŭ śviadomaści i razmaŭlaje ź piersanałam balnicy i svajakami», — zajaviŭ pradstaŭnik birminhiemskaj Balnicy karalevy Jelizaviety, dzie prachodzić lačeńnie Jusafzaj.

U Brytaniju tady jašče 14-hadovuju Małału pieravieźli ŭ kastryčniku minułaha hoda paśla taho, jak na dziaŭčynku napała hrupa bajevikoŭ «Talibana». Jusafzaj atrymała ahniastrelnaje ranieńnie ŭ hałavu. Dziaŭčynka zastałasia ŭ žyvych pa ščaślivaj vypadkovaści: kula, jakaja ŭvajšła joj u hałavu prosta nad levym vokam, prajšła ŭzdoŭž skivicy i amal nie kranuła mozhu.

1 lutaha stała viadoma, što Jusafzaj vyłučanaja na Nobieleŭskuju premiju miru.

Raniej miedyki paviedamili presie, što Jusafzaj viedaje, što taliby pahražajuć joj paŭtornymi zamachami, ale «nievierahodna rašuča» nastrojenaja i dalej adstojvać pravy žančyn na adukacyju. Svoj dziońnik pra žyćcio pry «Talibanie» Małała pačała vieści ŭ 2009 hodzie, va ŭzroście 11 hadoŭ. Za dva hady da hetaha taliby ŭziali pad kantrol dalinu Svat i zahadali začynić tam škoły dla dziaŭčat.

Kamientary da artykuła