Pieramovy nakont hazu zajšli ŭ tupik?
Namieśnik staršyni praŭleńnia «Hazpromu» Valery Hołubieŭ, jaki ačolvaje delehacyju rasiejskaha kancernu na pieramovach ab pahašeńni biełaruskich daŭhoŭ za haz, pakinuŭ Miensk i siońnia znachodziŭsia ŭ Maskvie.
Adzin z supracoŭnikaŭ «Hazpromu» na pytańnie našaha radyjo, ci adbyvajucca siońnia hazavyja pieramovy, na ŭmovie ananimnaści adkazaŭ tak: kali jany i praciahvajucca, dyk tolki na ŭzroŭni ekspertaŭ. Jon taksama dadaŭ, što da 30 lipienia navinaŭ, mabyć, nia budzie. Mienavita ŭ hety dzień čakajecca vizyt u Maskvu biełaruskaha premjera Siarhieja Sidorskaha.
Siońnia ab prablemie zapazyčanaści nahadaŭ i A. Łukašenka. Na selektarnaj naradzie jon adznačyŭ, što nia varta vykarystoŭvać haz dla zierniesušyłak, a treba pierachodzić na drovy:
«U nas i tak prablemy z apłataj pryrodnaha hazu. Urad, barukajučysia, viadzie hetyja pieramovy».
Biełaruski bok pa‑raniejšamu prosić rasiejskich partneraŭ adkłaści termin poŭnaj apłaty za vykarystany sioleta haz. Biełaruś paćviardžaje hatoŭnaść płacić peniu z sumy amal u 500 miljonaŭ dalaraŭ.
Raźličycca za haz patrebna było nie paźniej za 23 lipienia. Niekatoryja ekanamisty havorać, što nieabchodnyja dla hetaha hrošy jość. Čamu ž tady Biełaruś tak prosić adterminoŭki?
Dacent Maskoŭskaha instytutu mižnarodnych dačynieńniaŭ Kirył Koktyš ličyć, što heta źviazana z drennym finansavym stanam Biełarusi:
«Ja b nie skazaŭ, što ŭ Biełarusi nadta bahata hrošaj. Nu, jość biełaruskija rubli. Ale ž jość i słabaja mahčymaść kanvertavać ich u bolš mocnyja valuty. Mnie zdajecca, što valuty mocna nie chapaje. Što ž tyčycca niežadańnia viartać «Hazpromu» doŭh, z tych dalaraŭ, što atrymanyja ad «Hazpromu» za akcyi «Biełtranshazu», dyk heta jakraz arhument na toje, što Biełarusi patrebnyja hrošy».
Były ministar źniešnieekanamičnych suviaziaŭ Biełarusi Michaił Marynič ličyć inakš:
«Hrošy jość. Ale heta, ščyra kažučy, užo peŭnaja psichalahična‑narkatyčnaja zaležnaść, jakaja navat nie dazvalaje padumać lahična i pryniać rynkavaje rašeńnie. Možna było b užo i nie prynižacca, a prosta vykonvać damoŭlenaści».
Kirył Koktyš nie biarecca sprahnazavać, čym skončycca hetaja hazavaja historyja:
«Kali rasiejski prezydent nieadnarazova zajaŭlaŭ, što pierachod na rynkavyja dačynieńni z usimi — heta pytańnie vyrašanaje, dyk pavieści siabie niarynkava Rasieja ŭžo nia moža, nie zhubiŭšy pry hetym svajho tvaru. Što ž tyčycca Biełarusi, dyk dla jaje heta taksama nadzvyčaj važnaje pytańnie. I tamu napieradzie vidać tupik, jaki nia fakt, što budzie vyruleny navat na najvyšejšym uzroŭni».
A Michaił Marynič upeŭnieny, što Maskva hetym razam nie sastupić:
«Jana skaža jašče raz: nie chapaje hrošaj, nu dyk pradajcie jašče niešta. Naprykład, haradzienski «Azot». Ale ceny buduć užo nia rynkavyja, a tyja, što pradyktuje Maskva».
Zapazyčanaść Biełarusi za haz ŭźnikła, bo ŭ pieršym paŭhodździ za kožnuju tysiaču kubametraŭ hazu biełaruski bok pieravodziŭ na rachunki «Hazpromu» nia 100 dalaraŭ (košt adnoj tysiačy kubametraŭ), a tolki 55. Rasiejski kancern pahadziŭsia na takuju raźlikovuju formu, ale papiaredziŭ, što zapazyčanaść treba budzie likvidavać nie paźniej za 23 lipienia.