Biełaruskija daktary praviali druhuju ŭ śviecie apieracyju subłabarnaj aŭtatranspłantacyi lohkaha

Unikalnuju apieracyju pa subłabarnaj aŭtatranspłantacyi lohkaha vykanali ŭ adździaleńni tarakalnaj chirurhii i transpłantacyi lohkich Respublikanskaha navukova-praktyčnaha centra transpłantacyi orhanaŭ i tkanak.

Pra heta paviedamiŭ zahadčyk adździaleńnia Siarhiej Jaśkoŭ.

«Apieracyja ŭnikalnaja, jana druhaja ŭ śviecie. Pra pieršaje takoje chirurhičnaje ŭmiašańnie ŭ sakaviku 2012 hoda paviedamili japonskija chirurhi», — skazaŭ Siarhiej Jaśkoŭ.

Pieršuju ŭ Biełarusi subłabarnuju aŭtatranspłantacyju lohkaha vykanali 58-hadovamu mužčynu 1 lutaha. «My sutyknulisia ź niestandartnaj situacyjaj. U pacyjenta była puchlina levaha vierchniadolevaha broncha ź pierachodam na pačatkovyja adździeły nižniedolevaha. U takich vypadkach vykonvajecca pnieŭmanektamija — vydaleńnie ŭsiaho lohkaha. Ale ŭ našaha pacyjenta było ŭtvareńnie jašče i ŭ pravym lohkim. Hetaja situacyja zapatrabavała ad nas vykanańnia orhanazachavalnaj apieracyi na levym lohkim. Lohkaje dastali, jaho chvoraja vierchniaja dola i šosty siehmient nižniaj doli byli vydalenyja, paśla čaho toje, što zastałosia ad nižniaj doli — bazalnyja siehmienty, — było impłantavana ŭ pleŭralnuju połaść», — raskazaŭ Siarhiej Jaśkoŭ.

Apieracyja doŭžyłasia kala šaści hadzin. Jaje pravodziła bryhada ź dzieviaci supracoŭnikaŭ centra. Samaadčuvańnie praapieravanaha mužčyny zdavalniajučaje. «Jon užo hulaje pa adździaleńni, maje znosiny ź inšymi pacyjentami», — adznačyŭ śpiecyjalist.

Pieršaje ŭ respublicy adździaleńnie tarakalnaj chirurhii i transpłantacyi lohkich adkryłasia ŭ 9-j haradskoj kliničnaj balnicy Minska ŭ listapadzie 2012 hoda. Jano raźličanaje na 20 miescaŭ, i ŭ jaho zadačy ŭvachodzić asvajeńnie novych technałohij, padrychtoŭka da stvareńnia instalacyi ŭ krainie prahramy transpłantacyi lohkaha, vykanańnie apieracyj pa transpłantacyi hetaha orhana. Płanujecca, što pieršuju pierasadku lohkaha tut vykanajuć u druhim paŭhodździ 2013 hoda. Siońnia ž u adździaleńnie špitalizujuć pacyjentaŭ dla pastanoŭki paśla śpiecyjalnych abśledavańniaŭ u list čakańnia donarskaha orhana. Štohod u transpłantacyi lohkich u respublicy majuć patrebu kala 50 čałaviek.

«Niahledziačy na toje, što adździaleńnie isnuje ŭsiaho try miesiacy, my možam vykonvać tut lubyja orhanazachavalnyja apieracyi, jakija patrabujuć prymianieńnia transpłantacyjnych technałohij», — padkreśliŭ Siarhiej Jaśkoŭ.

Pa kolkaści transpłantacyj orhanaŭ Biełaruś zajmaje pieršaje miesca siarod krain SND.

Kamientary da artykuła