Jak śmierć Čavesa paŭpłyvaje na naftavyja i vajskovyja pahadnieńni
Śmierć prezidenta Vieniesueły Uha Čavesa moža baluča adbicca na ekanamičnych stasunkach pamiž Biełaruśsiu i Vienesuełaj.
Stasunki pamiž krainami, adznačajuć ekśpierty, trymalisia vyklučna na asabistym siabroŭstvie pamiž Uha Čavesam i Alaksandram Łukašenkam.
Śmierć Čavesa moža źmianić zamiežnuju palityku i adbicca na handlovym bałansie pamiž krainami. Jak heta paŭpłyvaje na samyja hučnyja biełaruska-vieniesuelskija prajekty — dastaŭki vieniesuelskaj nafty i supracoŭnictva ŭ vajskova-techničnaj śfiery?
Handlovy zvarot pamiž Biełaruśsiu i Vieniesuełaj ros hod ad hodu: kali ŭ 2000 hodzie jon składaŭ kala 2 młn dalaraŭ, to ŭ 2010 dasiahnuŭ 1,3 miljarda.
Vieniesueła zaniała miesca ŭ dziasiatcy važnych zamiežnaekanamičnych partnioraŭ Biełarusi.
Vieniesueła pryjšła na dapamohu ŭładam Biełarusi ŭ najbolš važnym ekanamičnym pytańni — žorstkich pieramovach pa pastaŭcy nafty z Rasiei.Kali Rasieja pasprabavała šantažavać kiraŭnika Biełarusi, uvioŭšy myta na naftu, Uha Čaves z Alaksandram Łukašenkam damovilisia, što nafta pajedzie ŭ Biełaruś tankieram z Łacinskaj Amieryki.
Što budzie ź vieniesuelskim naftavym prajektam paśla śmierci Čavesa, tłumačyć ekśpiert Taciana Manionak:
«I tady surjoznyja analityki kazali, što nafta ź Vieniesueły nie mahła być surjoznaj alternatyvaj. Heta doraha. Ale ździełka hetaja była niepryzrystaja. My nie viedajem usich detalaŭ.Mahčyma, byli bonusnyja dastavy. I ŭ hetym byŭ sens. Ale ž Biełaruś usio adno admoviłasia jašče ŭ pieršym paŭhodździ minułaha hodu. I ja nie dumaju, što hety prajekt budzie adnoŭleny, bo jość zacikaŭlenaść rasiejskich kampanijaŭ, jakija atrymali prava letaś upieršyniu pierapracoŭvać da pałovy nafty, što impartujecca z Rasijskaj Fiederacyi.
Jość pamiž našymi krainami sumiesnyja pradpryjemstvy, idzie budaŭnictva žytła, viadziecca pierapracoŭka sielskahaspadarčaj pradukcyi.
Adzin z samych važnych prajektaŭ,u jakim była zacikaŭlenaja Vieniesueła, i jaki sapraŭdy moža nie paciarpieć ad takich źniešnich pryčynaŭ jak śmierć Uha Čavesa — heta supraca ŭ vajskova-techničnaj śfiery.
Mienavita Biełaruś była abranaja vieniesuelskim kiraŭnictvam jak kaardynatar stvareńnia adzinaj systemy supraćpavietranaj abarony Vieniesueły.
Takaja supraca była vyhadnaja i Biełarusi, i Vieniesuele.
Mierkavałasia, što Biełaruś atrymaje prybytak u pamiery miljarda dalaraŭ, i budzie absłuhoŭvać SPA Vieniesueły doŭhija dziasiatki hadoŭ.Vyhladaje, što hety prajekt moža sapraŭdy stać doŭhaterminovym, — kaža ekspert Alaksandar Alesin:
«Kantrakt hety aceńvaŭsia ŭ 1 miljard dalaraŭ, i jašče byli pierśpiektyvy dadatkovych zamovaŭ. Kala 500 miljonaŭ dalaraŭ u jakaści pieradapłaty byli vypłačanyja. Vialikaja častka pracaŭ užo vykananaja. Častka zienitna-rakietnych kompleksaŭ Piačora 2M dastaŭlenyja ŭ traŭni 2012 hodu. Usiaho tam płanavałasia źmiaścić 20 bazaŭ SPA, 20 rajonaŭ. Častka ź ich užo na ŭzbrajeńni. Jany musili abaraniać najvažniejšyja pradpryjemstvy mietałurhii, transpartnyja centry, naftapierapracoŭčyja zavody, aeraporty, porty i tak dalej».
Alesin ličyć, što supraca ŭ hetaj śfiery anijak nie musić paciarpieć ad źmieny ŭłady ŭ Vieniesuele, niezdarma ambasadaram u Karakas nakiravany były kamandujučy vajenna-pavietranymi siłami i vojskami supraćpavietranaj abarony Biełarusi.