Biełaruski tydzień u Vilni: ad siońnia i da 30 sakavika
Na fota: dom, dzie znachodziłasia dom-drukarnia F.Skaryny, ciapier tut papularnaja kaviarnia.
Z 25 pa 30 sakavika ŭ Vilni projdzie «Biełaruski tydzień». U prahramu śviatočnaha tydnia ŭklučanyja roznyja mierapryjemstvy, jakija pačnucca z uračystaha śviatkavańnia Dnia Voli 25 sakavika.
Prahrama mierapryjemstvaŭ «Biełaruskaha tydnia» pačniecca 25 sakavika z uskładańnia kvietak padpisčykam Aktu Niezaležnaści Biełaruskaj Narodnaj Respubliki na vilenskich mohiłkach Rosy (12:00 — 13:00, Rasų g. 32). Taksama 25 sakavika z 18:00 — 20:00 u Vilenskaj haradskoj ratušy projdzie ŭračysty viečar u honar Aktu Niezaležnaści Biełaruskaj Narodnaj Respubliki.
26 sakavika z 13:00 — 15:00 u Siejmie Litvy projdzie kanfierencyja «Čaho čakać Biełarusi ad staršynstva Litvy ŭ Jeŭrapiejskim źviazie?».
27 i 28 sakavika hości zaprašajucca da prahladu prahramy fiestyvalu karotkamietražnych filmaŭ «Cinema Perpetuum Mobile» i sučasnych dakumientalnych filmaŭ asacyjacyi «Biełfilm».
Prahlad budzie prachodzić 27 sakavika z 18:00 — 20:30 u Biełaruskim Domie pravoŭ čałavieka (Latako g. 3) i 28 sakavika z 16:00 pa 20:30 u hetym ža miescy.
30 sakavika ŭ Jeŭrapiejskim humanitarnym univiersitecie projdzie dzień adčynienych dźviarej. 11:00 — 13:00 — prezientacyja navučalnych mahčymaściaŭ i akademičnych prahram, 13:00 — 14:30 — sustreča z administracyjaj (Valakupių g. 5).
«Biełaruski tydzień» zavieršycca fiestyvalem «Feel Free» z udziełam biełaruskich muzyčnych hurtoŭ «Krambambula» i «Niejra Dziubiel», a taksama litoŭskaha muzyčnaha hurtu «Biplan».Kancert pačniecca 30 sakavika ŭ 21:00 u kłubie LOFTAS (Švitrigailos g. 29).
Arhanizacyjny kamitet «Biełaruskaha tydnia» zaprašaje ŭsich biełarusaŭ Vilni, a taksama biełaruskich haściej litoŭskaj stalicy dałučycca da śviatkavańniaŭ, pryśviečanych Dniu Voli.
Arhanizatary «Biełaruskaha tydnia»: hramadzianskaja kampanija «Jeŭrapiejskaja Biełaruś», Biełaruski Dom pravoŭ čałavieka ŭ Vilni, Jeŭrapiejski humanitarny ŭniviersitet, Hramadzianskaje i palityčnaje pradstaŭnictva Biełarusi ŭ Litvie (HUB), Moładzievaja asacyjacyja «StudAlliance».