Pradajecca vydańnie Mamoničaŭ 1591 hoda

Na rasijskim internet-aŭkcyjonie pradajecca «Apostał», nadrukavany ŭ Vilni.

Adzin z čytačoŭ NN paviedamiŭ, što na aŭkcyjonie «Małatok» vystaŭlenaje na prodaž pieršaje vydańnie «Apostała» 1591 hoda. Knihu nadrukavali ŭ Vilni braty Łukaš i Kuźma Mamoničy.

Startavaja cana knihi — bolš za 27 500 dalaraŭ ZŠA. Za $51 500 možna nabyć vydańnie opcyjaj «kupi adrazu», nie ŭdzielničajučy ŭ aŭkcyjonie.

U knizie 273 arkušy. Jak paviedamlaje pradaviec, u «Apostale» niama pieršych staronak, dzie pavinnaja być starabiełaruskamoŭnaja epikhrama «Na hierby jasnavialmožnaha pana… Teadora Skumina», padpisanaja «A. R. Litvin». Jaje nasamreč napisaŭ Andrej Rymša — paet-paniehiryst, adzin z najbujniejšych pradstaŭnikoŭ staražytnaj biełaruskaj paezii druhoj pałovy XVI — pačatku XVII st. Pradaviec adznačaje, što niama taksama i hierba Skumina, a taksama pryśviačeńnia Mamoničaŭ Skuminu. Apošnija staronki knihi taksama adsutničajuć.

Zhodna z apisańniem łota, byccam by viadoma tolki 14 asobnikaŭ pieršaha vydańnia «Apostała». Adzin ź ich — u Nacyjanalnaj biblijatecy Respubliki Biełaruś. Ale pa słovach biełaruskich historykaŭ, u śviecie takich vydańniaŭ hulaje značna bolš, a adzin taksama maje Połacki muziej knihadrukavańnia.

Na dumku Andreja Radkova, studenta histaryčnaha fakulteta BDU, cana knihi nieadekvatnaja. Sam Andrej zajmajecca pošukam i viartańniem u biełaruskija muziei i archivy biełaruskaj spadčyny. Dziakujučy jamu była vykuplenaja Iškaldskaja mietryčnaja kniha, pravodziŭsia zbor srodkaŭ na vykup Statuta VKŁ. «Apošnim časam ceny na staryja rečy, źviazanyja ź Biełaruśsiu, padskočyli, — kaža Andrej. — Heta niezdarovaja tendencyja, raźličanaja na dyletantaŭ. My mahli b zładzić zbor srodkaŭ i znajšli b miecenata i na vykup hetaj knihi, ale jość sapraŭdy vartyja rečy, na jakija treba źbirać hrošy». Pavodle acenki Radkova, krasnaja cana «Apostała» Mamoničaŭ — nie bolšaja za 5000 dalaraŭ.

Kamientary da artykuła