Juryja Dorna vyzvalili ŭ zale suda
29 sakavika staršyniu Iŭdziejskaha relihijnaha abjadnańnia Juryja Dorna pryznali vinavatym u niavypłacie padatkaŭ, ale apraŭdali pavodle abvinavačańnia ŭ pieravyšeńni słužbovych paŭnamoctvaŭ. Jaho pakarali dvuma hadami kałonii. Adnak pakolki jon hod adbyŭ pad vartaj, jamu heta zaličyli pavodle pryncypu «adzin hod za dva».
Dorna vinavacili ŭ niavypłacie padatkaŭ i pieravyšeńni słužbovych paŭnamoctvaŭ. 21 sakavika dziaržaŭny abvinavaŭca Taćciana Rak paprasiła ŭ suda pakarać Dorna piaćciu hadami pazbaŭleńnia voli ŭ kałonii ŭzmocnienaha režymu z kanfiskacyjaj majomaści, a taksama zabaranić jamu zajmać pasady, źviazanyja z arhanizacyjna-rasparadčaj dziejnaściu ciaham 5 hadoŭ.
Raniej, vystupajučy ŭ sudzie Centralnaha rajona Minska z apošnim słovam, Juryj Dorn častkova pryznaŭ svaju vinu, u pryvatnaści va ŭchileńni ad vypłaty padatkaŭ.
Abvinavačvańnie ŭ pieravyšeńni słužbovych paŭnamoctvaŭ Dorn nie pryznaŭ, nazvaŭšy jaho «nadumanym», i zajaviŭ, što jano «nie vynikaje z materyjałaŭ spravy».
Dorna zatrymali hod tamu, 13 sakavika 2012 hoda.Śledčy kamitet paviedamlaŭ, što Juryja Dorna vinavaciać pavodle siami artykułaŭ Kryminalnaha kodeksa: aproč atrymańnia chabaru, pieravyšeńnie ŭłady ci słužbovych paŭnamoctvaŭ, uchileńnie ad vypłaty padatkaŭ, vykradańnie albo paškodžańnie dakumientaŭ, štampaŭ, piačatak i słužbovy padłoh, a taksama inšyja machinacyi z zdačaj majomaści ŭ arendu.
Pavodle materyjałaŭ śledstva, u 2001–2002 hadach Juryj Dorn niezakonnym čynam zavałodaŭ domam u Raduni, dzie žyŭ Israel Meir Pupko, viadomy jak Chafiec Chaim. Hety draŭlany budynak razabrali z dapamohaj miascovych žycharoŭ, vyvieźli praz pamiežny punkt Bieniakoni, dastavili ŭ port Kłajpiedy, a dalej vyvieźli ŭ ZŠA. Pavodle sajtu ješyvy Chafieca Chaima ŭ Ńju-Jorku, dom ciapier u ich i naležyć rabinu Zaksu.