U Mahilovie milicyja ŭziała ŭ abłohu niemcaŭ i palakaŭ
Milicyja blakavała pryvatny dom u Mahilovie (vulica Čkałava, 16), dzie adbyvaŭsia seminar aktyvistaŭ apazycyjnaha moładzievaha ruchu.
14 žniŭnia ŭ Mahilovie troje aktyvistaŭ polskich niaŭradavych arhanizacyjaŭ bolš za try hadziny prabyli ŭ abłožanym milicyjantami pryvatnym domie. Jany pryjechali ŭ Mahiloŭ na sustreču ź biełaruskimi kalehami — abmierkavać supracoŭnictva ŭ halinie navučańnia i raboty sa srodkami masavaj infarmacyi.
Razam z polskimi haściami abłohu trymali jašče kala piatnaccaci čałaviek. Troje ź ich — aktyvisty moładzievaj arhanizacyi «Treci šlach» ź Miensku.
6 milicyjantaŭ, troje ź jakich byli ŭ cyvilnym, uvarvalisia na padvorak pryvatnaha domu, kali praca ŭžo raspačałasia. Haspadary paśpieli začynić dźviery i zastavalisia ŭ domie bolš za try hadziny.
Kiraŭnik rehijanalnaj arhanizacyi partyi BNF Ryhor Kastusioŭ, uładalnik domu, vyklikaŭ milicejski narad. Z prybyćciom uzbrojenaha naradu milicyjanty sucišylisia.
U vyniku pieramoŭ palaki pahadzilisia viarnucca razam ź milicyjantami ŭ hatel, dzie pakinuli svaje dakumenty. Paśla pravierki pašpartoŭ hramadzianam Polščy dazvolili doŭžyć pobyt u Mahilovie.
Spraŭdžańnie pašpartoŭ niamieckich haściej zaciahnułasia amal na hadzinu. Milicyjanty damahalisia atrymać ad niemcaŭ zaprašeńni, bo, pavodle vizaŭ, tyja znachodziacca ŭ Mahilovie ŭ dziełavoj kamandziroŭcy. Paśla dakładnaha razboru niemcaŭ taksama adpuścili.
Spraŭdžańnie dakumentaŭ adbyvałasia ŭ faje hatelu «Mahiloŭ». Milicyjanty admovilisia kamentavać svaje dziejańni.
Uražańni pra abłohu i stasunki z pradstaŭnikami orhanaŭ achovy pravaparadku vykazaŭ «Svabodzie» adzin z polskich moładzievych aktyvistaŭ:
«Heta była pieršaja sytuacyja, kali ja sustreŭsia ź siłavymi orhanami Biełarusi. I heta było nia vielmi pryjemna. Ja nia moh im daviarać: mnie padałosia, jany šukajuć sposab, kab skazać, što my zrabili štości drennaje. Ja razmaŭlaŭ z supracoŭnikam, zdajecca, KHB (heta byli ludzi ŭ cyvilnym). Jany trymalisia pa‑chamsku, zusim nia mieli pašany da prava. Tamu davodziłasia być duža aściarožnym».
Niahledziačy na pieraškody z boku milicyi sustreča budzie doŭžycca, — zapeŭnivajuć arhanizatary. Havoryć adzin ź ich, Alaksandar Apiekin:
«Siońniašni dzień našaj sustrečy sarvany. Ale my ličym, što musim praciahvać. Naša prahrama budzie iści dalej — jak zaplanavana».
Arhanizatary sustrečy źviarnulisia da žurnalistaŭ z prośbaj nie nazyvać proźviščaŭ haściej — kab u ich zastałasia mahčymaść naviedać Biełaruś jašče raz i pracavać adpaviedna z prahramaj.