Alesin: Damova pra supraćpavietranuju abaronu abmiažoŭvaje niezaležnaść
Rasija zajaviła pra namier u 2015 raźmiaścić u Biełarusi svaju avijacyjnuju bazu. Sioleta budzie pastaŭlena pieršaje dziažurnaje źviano bajavych źniščalnikaŭ.
Ci pahražaje niezaležnaści Biełarusi raźmiaščeńnie rasiejskaj avijabazy ŭ Biełarusi? Suprać kaho buduć nacelenyja bajavyja źniščalniki? Voś što kaža vajskovy ahladalnik Alaksandar Alesin: «Ničoha novaha heta infarmacyja nie pryŭnosić. Heta ŭsio robicca ŭ miežach uzmacnieńnia rehijanalnaj systemy SPA. To bok nie adbyłosia novych abmiežavańniaŭ niezaležnaści Biełarusi dadatkova da taho, kali była padpisanaja Damova ab stvareńni adzinaj systemy SPA. Sama damova abmiažoŭvaje niezaležnaść Biełarusi, ale heta adbyłosia ŭžo ŭ momant padpisańnia.
Patencyjny praciŭnik tut, viadoma ž, krainy NATO, a niepasredny praciŭnik, kali sudzić pa vykazvańniach rasiejskich vajskovych ekspertaŭ — heta, vidać, 48 amerykanskich źniščalnikaŭ F-16, jakija planujecca pierabazavać u Polšču ź Italii».
Soŭś: «A što z hetaj damovy budzie mieć Biełaruś?»
Alesin: «Tut treba razhledzieć dva aspekty — vajskovy i ekanamičny. Ad 1 śniežnia minułaha hodu spynienyja paloty vyniščalnikaŭ Su-27, ciažkich pierachopnikaŭ, jakija składali značnuju častku našaj systemy SPA. Jašče raniej, u lutym minułaha hodu, vyviedzieny z ekspluatacyi frantavyja bambaviki Su-24. Viadoma ž, heta značna asłabiła moc biełaruskaj systemy SPA i VPS, i heta treba było kampensavać. Pakolki Biełaruś nia ŭ stanie kupić takija samaloty, bo kožny ź ich kaštuje da 50 miljonaŭ dalaraŭ, dyk rasiejski avijapołk maje zakryć hetuju dziru ŭ systemie SPA.
Što tyčycca ekanamičnaha aspektu, dyk ja dumaju, što Łukašenka pahadziŭsia na heta ŭ abmien na niejkija lhoty i preferencyi. Mahčyma havorka idzie pra novyja kredyty, mahčyma pra padpisańnie naftavaha balansu — pahladzim».