Milicyja źbiła Nastu Pałažanku
Brutalna razahnanaja akcyja salidarnaści ź siemjami źnikłych i represavanych.
Štomiesiačnaja akcyja salidarnaści ź siemjami źnikłych i represavanych učora ŭ Miensku skončyłasia źbićciom jaje ŭdzielnikaŭ.
Pieršaja hrupa ludziej pryjšła da kaściołu Śviatoha Jazepa a 19:00, jana była niešmatlikaj – kala 15 čałaviek. Siarod ich byŭ Pavał Sieviaryniec, Źmicier Chviedaruk, Nasta Pałažanka i inš. Jany dałučylisia da viernic, jakija štodnia stajać pad ścienami bažnicy. Ludzi pračytali “Mahutny Boža”, paśla čaho razyšlisia. Za ŭsim hetym pilna nazirali pradstaŭniki pravaachoŭnych orhanaŭ i specsłužbaŭ. Jany praviarali dakumenty i zaplečniki prysutnych. Paŭła Sieviarynca milicyjanty prasačyli až da domu, ale nie zatrymali.
Na hetym akcyja nia skončyłasia – dzieści praz hadzinu častka ludziej znoŭ padyšła da kaściołu. Kolkaść udzielnikaŭ ŭzrasła – było niedzie 40 čałaviek, stała bolej i milicyi. Ludzi pračytali malitvu “Ojča naš...”. Paśla niechta ź milicyjantaŭ vyhuknuŭ: “Vypichvaj heta bydła”. Ludziej nakiravali ŭbok Śvisłačy, niedaloka ad jakoj i adpuścili.
Adnak i heta byŭ nie apošni padychod da kaściołu. Jašče praź niekalki chvilinaŭ ludzi znoŭ pryjšli da chramu, ich było čałaviek 50. Jany mieli z saboj partrety Alaksandra Kazulina, Źmitra Daškieviča, Źmitra Zavadzkaha. Milicyjanty skamandavali, kab prysutnyja razychodzilisia, ale heta nie padziejničała. Paśla hetaha AMAPaŭcy pačali brać u koła ludziej, jakija sieli na hanak kaściołu.
Udzielnikaŭ akcyi žorstka vyšturchoŭvali z prystupak kaściołu. Nastu Pałažanku ŭdaryli nahoj pa śpinie, dastavałasia i inšym. Byŭ vypadak, što adzin AMAPaviec źbivaŭ chłopca, kali druhi jaho trymaŭ.
Ludziej pačali vyšturchoŭvać ubok vulicy Bahdanoviča. U hety čas na prypynak padychodziŭ tralejbus №46, u jaho i sieli ŭsie ŭdzielniki akcyi. Taksama ŭ tralejbus sieła šmat milicyjantaŭ, jakija stajali la dźviarej i nikoha nie vypuskali.
Pobač la Čarnobylskaj kaplicy tralejbus spyniŭsia “z techničnych pryčyn”. Da jaho adrazu padjechaŭ aŭtazak. Moładź dumała, što tudy buduć zapichvać ich, adnak u mašynu sieli sami AMAPaŭcy. Paśla hetaha ni ŭ kaho ŭžo nie było žadańnia viartacca iznoŭ da kaściołu.
Paźniej kala kinateatru Maskva byŭ zatrymany adzin z udzielnikaŭ akcyi salidarnaści Mikita Sasim. Najchutčej, što jaho buduć siońnia sudzić.