Biez «nijakaj prynudziłaŭki» rabotniki Staŭbcoŭskaha rajona zdali hrošy za adzin pracoŭny dzień na zakup tratuarnaj plitki
Takija listy, padpisanyja staršynioju Staŭbcoŭskaha rajvykankama Uładzimiram Miśko, atrymali kiraŭniki rajonnych pradpryjemstvaŭ.
Miesiac tamu adbyŭsia respublikanski subotnik, pryśviečany hodu bieražlivaści. Na im Łukanenka zalivaŭ cemient na budučaj Płoščy dziaržaŭnaha ściaha. Adnak subotnikaŭ mnoha nie byvaje, tamu rajvykankam Staŭbcoŭskaha rajona vyrašyŭ pravieści padobnaje mierapryjemstva ŭ svaim rajonie 18 maja.
U rasparadžeńni «Našaj Nivy» akazaŭsia dakumient «Ab praviadzieńni rajonnaha subotnika», padpisany staršynioj Staŭbcoŭskaha rajvykankama Uładzimiram Miśko. U im havorycca, što «subotnik budzie pravodzicca na pracoŭnych miescach ci na dobraŭparadkavańni nasielenych punktaŭ, miemaryjalnych kompleksaŭ, miescaŭ bajavoj i vajskovaj słavy, pachavańniaŭ, a taksama padrychtoŭcy azdaraŭlalnych letnikaŭ da letniaha siezonu».
Taksama list paviedamlaje numar raźlikovaha rachunku, kudy musiać być pieraličanyja hrašovyja srodki ŭ pamiery adnadzionnaha zarobku razam z premijaj. Pavodle dakumienta, usie hrašovyja srodki pojduć na paradkavańnie horada Stoŭbcy.
List maje zahadny ład — u im paviedamlajecca, što «kiraŭnikam arhanizacyj rajona pad asabistuju adkaznaść nieabchodna arhanizavać rabotu pracoŭnaha kalektyva na zamacavanych terytoryjach i pravieści instruktaž pa technicy biaśpieki».
U liście za podpisam Miśko niama ni słova pra dobraachvotnaść udziełu ŭ subotnikach i ab pryncypie dobraachvotnaha pieraličeńnia hrošaj, zaroblenych padčas subotnika supracoŭnikami arhanizacyj. Choć heta, zdavałasia b, naturalna. Cikavy taksama toj fakt, što 18 maja biełarusy adpracoŭvali za 10 maja.
«Pracoŭnyja kalektyvy arhanizacyj usich formaŭ ułasnaści vyjšli na rajonny subotnik. Jany pracujuć na rabočych miescach, zaniatyja na rabotach pa dobraŭparadkavańni vulic i terytoryj u horadzie i sielskich nasielenych punktach, pa padrychtoŭcy azdaraŭlenčych dziciačych łahieraŭ da letniaha siezona» — mienavita tak aśviatlaŭsia rajonny subotnik na sajcie Staŭbcoŭskaha rajvykankama.
«Nijakaj prynudziłaŭki»
Na žal, Uładzimira Miśko byŭ u adjeździe. Adnak jaho namieśnik Alaksandr Cyvaka adkazaŭ na pytańni.
«NN»: Kolki arhanizacyj uziali ŭdzieł u rajonnym subotniku i čamu jaho pryznačyli na pracoŭnuju subotu?
Alaksandr Cyvaka: Usie arhanizacyi rajona. Ale jon prachodziŭ nie na pracoŭnych miescach, a na abjektach. Što tyčycca pracoŭnaj suboty — dyk kali jaho pravodzić? Nie ŭ niadzielu ž.
«NN»: Adnak u dakumiencie za podpisam Uładzimira Miśko značycca, što subotnik prachodziŭ i na pracoŭnych miescach.
AC: Tak, tak, i na pracoŭnych.
«NN»: Jak harantavałasia dobraachvotnaść udziełu ŭ subotniku i pieraličeńnia adnadzionnych zarobkaŭ na rachunak? Bo pa liście, jaki pierasłali ŭ našu redakcyju, nie padobna, što jon nosić rekamiendacyjny charaktar.
AC: Nam ciažka parazumiecca, bo ja nie viedaju, pra jaki dakumient vy kažacie, ja pra jaho nie viedaju. U nas jość rašeńnie rajvykankama № 662, i jano imienna rekamienduje kiraŭnikam arhanizacyj uziać udzieł u subotniku. I kali ŭziać punkt № 5 hetaha rašeńnia, tam napisana, što supracoŭnikam rekamiendujecca pieraličyć svaje zarobki ŭ pamiery, jaki jany vyznačajuć sami. Tamu nichto nikoha nie prymušaŭ, niama nijakaj prynudziłaŭki.
A hetyja hrošy pajšli na zakup plitki dla tratuaraŭ i bardziuraŭ. Pracy pa jaje ŭkładcy apłočvaje rajvykankam. U nas usio prazrysta, pra raschody zaŭsiody ŭ miascovaj haziecie pišam. Vy lepš sami pryjazdžajcie da nas u horad — my vam usio pakažam, dzie i što było zroblena.