Prezident Izraila nie pryjechaŭ u Višnieva da svajho 90-hodździa, prysłaŭ dačku
U Vałožynie (Minskaja vobłaść) i ŭ miastečku Višnieva (Vałožynski rajon), na radzimie prezidenta Izraila Šymona Pieresa, prajšli imprezy, pryśviečanyja 90-hodździu z dnia jaho naradžeńnia.
Dačka Pieresa Ćvii Valden i pasoł Izraila Iosif Šahał adkryli vystavu «Šymon Pieres: šlach ad Vilenskaj vulicy ŭ Višnievie da Prezidenckaj vulicy ŭ Jerusalimie».
Taksama byŭ ustalavany pamiatny znak na miescy, dzie stajaŭ dom siamji Pierskich i dzie naradziŭsia chłopčyk Šymon.Aprača taho, adbyŭsia kancert artystaŭ ź Biełarusi i Izraila, ekskursija pa habrejskich miaścinach Vałožyna i cyrymonija ŭšanavańnia pamiaci achviaraŭ Chałakosta ŭ vioscy Višnieva.
Ad siadziby Pierskich u Višnievie zachavaŭsia kałodziež, ź jakoha hości papili vady.
Šymon Pieres žyŭ u Višnievie da 11 hadoŭ, u 1934 h. razam ź siamjoju jon emihravaŭ u Paleścinu. Usie jahonyja svajaki, jakija zastalisia ŭ Višnievie, zahinuli ŭ časie Druhoj suśvietnaj vajny.
Pieres źjaŭlajecca najstarejšym prezidentam krainy ŭ śviecie, 90 hadoŭ jamu spoŭnicca 2 žniŭnia. Na pačatku 1990-ch Pieres, budučy ministram zamiežnych spraŭ Izraila, naviedvaŭ rodnaje miastečka. Choć jon nie byŭ tam 60 hadoŭ, jon adrazu paznaŭ i znajšoŭ rodnaje kotlišča, i kałodziež.