Prezident Jeŭraparłamienta nazvaŭ Łukašenku dyktataram, «ruki jakoha zaplamleny kryvioju»
Pra heta Marcin Šulc zajaviŭ u piatnicu ŭ Vilni.
«Heta dyktatar, ruki jakoha zaplamlenyja kryvioju, i jamu nie miesca ŭ našaj demakratyčnaj supolnaści», — zajaviŭ Šulc na sustrečy kiraŭnikoŭ frakcyj Jeŭraparłamienta ŭ Vilni z kiraŭnikami frakcyj i kamitetaŭ Sojma Litvy.
Tak jon adreahavaŭ na pytańnie kiraŭnika Kamiteta pa zamiežnych spravach (KZS) Sojma Litvy Bieniedyktasa Jodki pra toje, ci varta zaprašać na listapadaŭski samit «Uschodniaha partniorstva» ŭ Vilni pradstaŭnikoŭ Biełarusi.
Litoŭski deputat razvažaŭ, što pradstaŭnikoŭ Biełarusi varta zaprasić na vilenski samit, jaki adbudziecca ŭ listapadzie hetaha hoda.
Jodka adznačyŭ, što pa ranhu varta było b zaprasić Łukašenku, ale jon uniesieny ŭ śpis asobaŭ, niepažadanych na terytoryi JEZ. Kali zaprasić premjera Michaiła Miaśnikoviča, to, na dumku kiraŭnika KZS, Łukašenka razzłujecca, što jaho abminuli, a kiraŭnik MZS Biełarusi Uładzimir Makiej taksama ŭniesieny ŭ «čorny śpis».
«Važna zrazumieć adnu reč — što jak by my nie pastupili ź Biełaruśsiu, my pavinny vyrazna ŭśviedamlać — Alaksandr Łukašenka źjaŭlajecca dyktataram, jaki tolki ŭ minułym hodzie zahadaŭ abviaścić śmiarotny prysud dvum maładym ludziam, choć, na maju dumku, jany byli całkam nie vinavatyja. Ja asabista rasceńvaju heta jak palityčnaje zabojstva», — zajaviŭ kiraŭnik JEP u adkaz Jodku.
Ź inšaha boku, jon akcentavaŭ, što nielha karać uvieś biełaruski narod, jaki i tak pakutuje ad praŭleńnia dyktatara.
«My pavinny znajści siaredni šlach. Z adnaho boku, kažučy jasnaje „nie“ hetamu dyktataru, z druhoha boku, imknučysia adkryć dźviery biełaruskamu narodu. Znajści hety siaredni šlach nie lohka, u nas niama zahadzia padrychtavanaha receptu dla hetaha», — skazaŭ Šulc.
Nahadajem, samit «Uschodniaha partniorstva» JEZ u Vilni ŭ kancy listapada pravodzicca tamu, što ŭ hety čas Litva budzie staršynstvavać u Radzie JEZ.
Niemiec Šulc viadomy ščyraściu i rezkaściu svaich vykazvańniaŭ.