Kamitet AAN pa pravach čałavieka padtrymaŭ homielskaha aktyvista
Kamitet AAN pa pravach čałavieka pryznaŭ fakt parušeńnia ŭładami Biełarusi prava hamialčanina Andreja Alaškieviča na svabodu raspaŭsiudžvańnia infarmacyi, paviedamiŭ BiełaPAN pravaabaronca Leanid Sudalenka.
Razmova idzie pra padziei 2008 hoda, kali Alaškievič raspaŭsiudžvaŭ ulotki ab sustrečy apazicyjnaha palityka Alaksandra Milinkieviča z žycharami Homiela, što mieła adbycca. Supracoŭniki milicyi zatrymali jaho, a sud pryznaŭ vinavatym i aštrafavaŭ. Alaškievič paličyŭ, što takim čynam ułady parušyli jaho kanstytucyjnaje prava na raspaŭsiudžvańnie infarmacyi, i z dapamohaj pravaabaroncy Sudalenki pasprabavaŭ asprečyć dziejańni milicyi i rašeńnie suda. Homielski aktyvist prajšoŭ usie sudovyja instancyi ŭ Biełarusi, ale biezvynikova — nacyjanalnaje zakanadaŭstva zabaraniaje raspaŭsiudžvać infarmacyju ab masavych mierapryjemstvach, jakija nie sankcyjanavanyja ŭładami.
U vyniku Alaškievič źviarnuŭsia ŭ Kamitet AAN pa pravach čałavieka (KPČ), jaki pryznaŭ, što dziaržava parušyła jaho hramadzianskaje prava. Kamitet rekamiendavaŭ uładam Biełarusi vypłacić Alaškieviču ŭsie paniesienyja straty, ciaham 90 dzion apublikavać hetaje rašeńnie ŭ dziaržaŭnych ŚMI, a taksama prainfarmavać KPČ ab vykanańni hetych rekamiendacyj.
«Ale ŭsio ž samym hałoŭnym dasiahnieńniem Andreja Alaškieviča možna ličyć toje, što mižnarodnyja ekśpierty rekamiendavali ŭradu Biełarusi źmianić normy nacyjanalnaha zakanadaŭstva ab masavych mierapryjemstvach i pryvieści ich u adpaviednaść ź Mižnarodnym paktam ab hramadzianskich i palityčnych pravach, jaki Biełaruś u svoj čas padpisała», — padkreśliŭ Sudalenka.