Bank «BiełVEB» ustalavaŭ la svajho ofisa bronzavy «Dyjałoh»
U centry Minska źjaviłasia novaja pryhožaja skulptura.
Bank «BiełVEB» ustalavaŭ la svajho ofisa bronzavy «Dyjałoh».
Aŭtar pomnika skulptar Kanstancin Sielichanaŭ.
Staršynia praŭleńnia banka «BiełVEB» Pavieł Kałavur.
Ad siońnia ŭ Minsku stała na adnu skulpturu bolej. Bank «BiełVEB» uračysta adkryŭ na placoŭcy la svajho centralnaha ofisa na praśpiekcie Pieramožcaŭ skulpturu «Dyjałoh».
Pradstaŭniki banka zajavili, što paŭtaratonnaja bronzavaja praca biełaruskaha skulptara Kanstancina Sielichanava musić simvalizavać hałoŭnyja jakaści banka: jaho adkrytaść i hatoŭnaść da dyjałohu z klijentami.
Sielichanaŭ raskazaŭ žurnalistam, što stvaraŭ skulpturu ciaham šaści miesiacaŭ. Pavodle jaho słovaŭ, nie abyšłosia i biez praciahłych dyskusijaŭ z zamoŭcami skulptury, ale ŭsie roznahałośsi byli paśpiachova pieraadolenyja.
Zdymali pokryva z pomnika staršynia praŭleńnia banka «BiełVEB» Pavieł Kałavur i namieśnik staršyni Centralnaha rajona Raman Dmitranica.
Cikava, što dla prezientacyi skulptury, jakaja simvalizuje hatoŭnaść da dyjałohu i adkrytaść, placoŭku pierad budynkam banku i častku parkoŭki la hatelu «Płanieta» abnieśli mietaličnaj aharodžaj, a ludziej prapuskali pa śpisach ci pa zaprašeńniach.
— My da hetaha nie majem dačynieńnia — nažal, takimi byli patrabavańni słužby achovy. Ale sam bank praciahvaje palityku adkrytaści i prazrystaści. Nahadaju, my adziny bank u Biełarusi, jaki publikuje spravazdačy ab ustojlivym raźvićci. Užo druhuju pa liku spravazdaču možna čakać u hetym miesiacy, — prakamientavaŭ situacyju Pavieł Kałavur.