Pałata pryniała ŭ pieršym čytańni papraŭki ŭ zakon ab pryvatyzacyi

Deputaty Pałaty pradstaŭnikoŭ na pasiadžeńni 26 červienia pryniali ŭ pieršym čytańni zakonaprajekt ab uniasieńni źmienaŭ u zakon «Ab pryvatyzacyi dziaržaŭnaj majomaści i pieraŭtvareńni dziaržaŭnych unitarnych pradpryjemstvaŭ u adkrytyja akcyjaniernyja tavarystvy».

Pavodle słoŭ staršyni Dziaržaŭnaha kamiteta pa majomaści Hieorhija Kuźniacova, zakonaprajekt raspracavany «z metaj abarony pravoŭ i svabod hramadzian Biełarusi, uklučajučy minarytarnych akcyjanieraŭ». Dakumient, u pryvatnaści, pieradaje pradstaŭnikam dziaržavy mahčymaść hałasavać na schodach akcyjaniernych tavarystvaŭ hałasami minarytaryjaŭ. Tak, u tych AAT, dzie dziarždola składaje 50 i mienš pracentaŭ, pradstaŭniki dziaržavy zmohuć hałasavać na ahulnym schodzie akcyjanieraŭ hałasami, što naležać minarytarnym akcyjanieram, jakija majuć prava na ŭdzieł u schodzie i nie prajšli va ŭstanoŭlenym paradku rehistracyju dla ŭdziełu ŭ im.

Aprača taho, zakonaprajekt praduhledžvaje mahčymaść pryznačeńnia dziaržpradstaŭnikoŭ navat u tyja akcyjaniernyja tavarystvy, stvoranyja ŭ pracesie pryvatyzacyi, u jakich u dziaržavy niama doli.

U adpaviednaści z zakonaprajektam, dziaržpradstaŭniki zmohuć prypyniać vykanańnie rašeńniaŭ ahulnaha schodu akcyjanieraŭ u vypadku, «kali realizacyja hetych rašeńniaŭ supiarečyć hramadskaj karyści i biaśpiecy, nanosić uron navakolnamu asiarodździu, uščamlaje pravy i intaresy inšych asob, jakija abaraniajucca zakonam». Pry hetym rašeńnie ab prypynieńni vykanańnia rašeńnia ahulnaha schodu akcyjanieraŭ unosicca dziaržpradstaŭnikom akcyjaniernamu tavarystvu nie paźniej za dzień, jaki idzie za dniom praviadzieńnia ahulnaha schodu, šlacham nakiravańnia jaho pa faksimilnaj suviazi, pa elektronnaj pošcie ci inšym dastupnym sposabam. U miesiačny termin z dnia praviadzieńnia ahulnaha schodu akcyjanieraŭ, vykanańnie rašeńnia jakoha prypyniena, abłasny, Minski haradski vykanaŭčy kamitet, jaki pryznačyŭ dziaržpradstaŭnika, źviartajecca ŭ haspadarčy sud ź iskam ab pryznańni niesapraŭdnym prypynienaha rašeńnia ahulnaha schodu akcyjanieraŭ.

Na dumku dziełavoj supolnaści, instytut uładalnickaha nahladu, stvareńnie jakoha praduhledžvaje zakonaprajekt, faktyčna pryviadzie da adnaŭleńnia dziejańnia ŭ krainie «załatoj akcyi», admienienaj u 2008 hodzie.

Staršynia Biełaruskaj navukova-pramysłovaj asacyjacyi Alaksandr Šviec miarkuje, što asnoŭnyja miechanizmy «załatoj akcyi» ŭ vypadku pryniaćcia zakonaprajekta znoŭ zapracujuć. «Heta dazvolić błakiravać ździełki nie tolki ŭ momant ich zaradžeńnia, ale i paśla taho, jak jany adbuducca. Kali ździełka admianiajecca praź niekalki hadoŭ — najbolš strašna», — kamientavaŭ raniej Šviec nastupstvy pryniaćcia zakonaprajekta.

Pradstaŭniki biźniesu, a taksama mižnarodnych finansavych arhanizacyj nieadnarazova źviartalisia va ŭrad u suviazi z padrychtoŭkaj hetaha zakonaprajekta. Tak, členy Kansultatyŭnaha savieta pa zamiežnych inviestycyjach pry Saviecie ministraŭ źviartalisia ŭ lutym hetaha hoda da prem'jer-ministra, vykazvajučy zaniepakojenaść padrychtavanym zakonaprajektam.

«Mahčymaść nakładańnia čynoŭnikami zabarony na šerah rašeńniaŭ akcyjaniernych tavarystvaŭ pa sutnaści aznačaje viartańnie da situacyi, anałahičnaj isnavańniu admienienaha jašče ŭ 2008 hodzie instytuta «załatoj akcyi», — zaznačali ŭ svaim liście členy Kansultatyŭnaha savieta.

Aprača taho, pavodle najaŭnych źviestak, padobnuju zaniepakojenaść vykazvali pradstaŭniki Suśvietnaha banka i Mižnarodnaj finansavaj karparacyi (IFC), jakija taksama adpraŭlali listy na imia prem'jer-ministra Biełarusi.

Nahadajem, što z druhoj pałovy 1990-ch u Biełarusi dziejničaŭ miechanizm «załatoj akcyi», jaki ŭjaŭlaŭ ź siabie asablivaje prava dziaržavy na kiravańnie pradpryjemstvami navat u tych vypadkach, kali dziarždola ŭ ich adsutničała. U 2008-m «załataja akcyja» była admienienaja.

Kamientary da artykuła