Łukašenka: Biełaruś budzie aporaj kitajskaj impieryi ŭ Jeŭropie

Realizacyja prajekta pa budaŭnictvie kitajska-biełaruskaha industryjalnaha parku dazvolić atrymlivać ad ekspartu dadatkova da 50 młrd. dołaraŭ štohod.

Pavodle jaho słoŭ, biełaruski bok vielmi raźličvaje na hety prajekt. «Viadoma ž, viadučuju rolu tut adyhraje Kitajskaja Narodnaja Respublika, — pryvodzić cytatu Łukašenki pres-słužba prezidenta. — Heta inviestycyi viadučych kampanij śvietu, jakija siońnia pracujuć u Kitai. Heta kredyty Kitajskaj Narodnaj Respubliki. Dobra, što valutnych reziervaŭ u Kitai dastatkova. Ich treba, viadoma ž, kudyści inviestavać. I paviercie, heta pryznańnie nadziejnaści Biełarusi ŭ vačach kitajskaha kiraŭnictva, kitajskich śpiecyjalistaŭ, kitajskaha naroda. Vy ŭ niestabilnuju krainu svaje hrošy ŭkładvać nie budziecie».

Łukašenka padkreśliŭ, što stvarajecca nie «park adviortak». «Tut pavinien vyrablacca vysokatechnałahičny pradukt zaŭtrašniaha dnia: ad raspracovak da vytvorčaści, u kančatkovym liku, kankretnaha tavaru, jaki pojdzie na rynak», — skazaŭ jon.

Aficyjny lidar adznačyŭ, što z Kitajem vyrašany ŭsie arhanizacyjnyja pytańni i baki pačynajuć budaŭnictva pradpryjemstvaŭ, navukova-techničnych, kanstruktarskich centraŭ pa raspracoŭcy i vytvorčaści vysokatechnałahičnaha tavaru.

«Kali Kitajskaja Narodnaja Respublika pazicyjanuje siabie siońnia ŭžo jak impieryja, u dobrym sensie słova, kali heta viadučaja dziaržava — bieź Jeŭropy, biez hetaha centra jana raźvivacca nie moža. Ja miarkuju, što Kitajskaja Narodnaja Respublika abrała Biełaruś… Tut vydatnaja łahistyka na vysokatechnałahičnyja i apłačvanyja rynki», — ličyć Łukašenka.

Kamientary da artykuła