Mafija i mirnyja žychary
Biełarusy, davajcie jadnacca!
Chto hulaŭ u mafiju — viedaje, jakoje heta zachaplalnaje baŭleńnie času. Kali hulaješ mirnym žycharom — trasiešsia, kab nie być «zabitym» nočču, a dniom šukaješ padtrymki ŭ takich ža patencyjnych achviar, jak i ty, kab razam znajści «zabojcaŭ»; kali hulaješ za mafijozaŭ — praličvaješ chady napierad, uklučaješ usiu siłu svajho rozumu, kab razam sa svaim naparnikam «zabić» siemiarych mirnych.
Na moj pohlad, sučasnaje biełaruskaje hramadstva i padziei, jakija ŭ im adbyvajucca, padobnyja na hetu hulniu. Vielmi sumna adznačać, ale mafija pakul što ŭpeŭniena pieramahaje.Pryčym, jak tolki jaki-niebudź mirny žychar pačynaje adkryta sihnalizavać padčas dzionnych abmierkavańniaŭ pra mafiju, — taja jaho adrazu zabivaje unačy, što ŭ našych realijach aznačaje kidańnie ŭ turmu ci vymušanuju emihracyju. Što ž robić našych «mafaŭ» takimi mocnymi?! Mudryja taktyčnyja dziejańni — biezumoŭna, ale samaje hałoŭnaje — jany dziejničajuć zaadno, razam. Łahična, kab pieramahli «mirnyja žychary», nam treba ŭsiaho tolki abjadnacca.
Na moj pohlad, siońnia źjaviłasia bliskučaja mahčymaść dla jadnańnia biełarusaŭ. Pačaŭsia zbor podpisaŭ za nadańnie histaryčnamu biełčyrvonabiełamu ściahu statusa dziaržaŭnaj kaštoŭnaści.Šmat chto kaža, što ŭłady ŭsio roŭna znoŭ admoviać, što zvarot aformleny nie idealna. Usio heta, mahčyma, tak, ale, jak pa mnie, takija kamientary — heta admazki biełarusaŭ, jakija ničoha nie chočuć rabić, a tolki bałbatać i nyć na kuchniach — jak u nas usio drenna i jaki režym žorstki. Ja hanarusia i zachaplajusia ziemlakami, jakija achviarujuć svajoj svabodaj dla pieramien u rodnaj krainie, sam ža na takija achviary, pakul, nie hatovy. Ale ja hatovy achviaravać chacia b svaim časam, kab razdrukavać zvaroty, prajścisia pa rodnych, siabrach, znajomych z prośbaj ich padpisać i tym ušanavać našu histaryčnuju pamiać.
Ja ŭpeŭnieny, što mienavita takimi akcyjami salidarnaści i hadujecca hramadzianskaja supolnaść. Taja hramadzianskaja supolnaść, jakaja i pavinna ruchać napierad našu krainu, a ŭ sučasnych umovach — vyciahvać našu Radzimu z bahny.Siońnia my padpisvajem zvaroty, zaŭtra — ładzim akcyi salidarnaści sa zvolnienymi rabotnikami «Hranita», vykładčykami Harodzienskaha ŭniviersiteta, ci arhanizoŭvajem pikiet suprać raźmiaščeńnia rasijskaj avijabazy, jakaja parušaje naš vajskovy niejtralitet. Biełarusy, davajcie jadnacca! Davajcie stvarać hetu narodnuju siłu, jakaja stanie padmurkam novaj, biełaruskaj Biełarusi. Davajcie pakažam prykład salidarnaści i pavahi da svaich prodkaŭ, abjadnajemsia, i tady nijakaja mafija nam nie budzie strašnaja!