Patryjarch Maskoŭski prybudzie ŭ Minsk viečaram 28 lipienia

Patryjarch Maskoŭski i ŭsioj Rusi Kirył prybudzie ŭ Minsk na śviatkavańnie 1025-hodździa Chryščeńnia Rusi viečaram 28 lipienia (niadziela). Pra heta paviedamiŭ na pres-kanfierencyi 24 lipienia kiraŭnik spravami Biełaruskaha ekzarchata archijepiskap Navahrudski i Lidski Huryj.

Razam z kiraŭnikom RPC u Minsk prybuduć pradstaŭniki i pradstajacieli pravasłaŭnych cerkvaŭ z roznych krain. U pryvatnaści, čakajecca pryjezd patryjarcha Aleksandryjskaha Fiodara, patryjarcha Ijerusalimskaha Fieafiła, patryjarcha Hruzinskaha Ilii, patryjarcha Sierbskaha Irynieja, archijepiskapa Kiprskaha Chryzastoma, mitrapalita Varšaŭskaha Savy i mitrapalita Amierykanskaha Cichana. Va ŭračystaściach voźmuć udzieł pastajannyja členy śviatych sinodaŭ Ruskaj i Biełaruskaj pravasłaŭnaj cerkvaŭ. Čakajecca, što ŭ śviatach voźmuć udzieł bolš jak 80 archirejaŭ.

Akramia taho, u Minsk prybuduć bolš jak 50 tysiač pałomnikaŭ z usich jeparchij Biełaruskaha ekzarchata i sumiežnych dziaržaŭ, paviedamiŭ archijepiskap Huryj.

Pavodle zaćvierdžanaj prahramy, śviatkavańni 1025-hodździa Chryščeńnia Rusi adkryje 29 lipienia ŭ 7.30 chresny chod ad chrama śviatoj Maryi Mahdaliny pa praśpiekcie Mašerava da Minskaha zamčyšča. U 9.30 na miescy zamčyšča pad adkrytym niebam patryjarch Maskoŭski i ŭsiaje Rusi Kirył z udziełam zaprošanych pradstajacielaŭ pravasłaŭnych cerkvaŭ praviadzie liturhiju.

Zatym adbudziecca zakładka pamiatnaj hramaty ŭ padmurak staražytnaha pravasłaŭnaha chrama XI stahodździa ŭ Minsku, jaki płanujuć adnavić na miescy zamčyšča. U 14.00 tut ža pačniecca śviatočny kancert z udziełam pradstaŭnikoŭ usich abłaściej Biełarusi. U 18.00 adbudziecca ŭskładańnie vianku da abieliska na płoščy Pieramohi, a ŭ 19.30 pačniecca ŭračysty kancert u honar 1025-hodździa Chryščeńnia Rusi la chrama-pomnika ŭ honar usich śviatych. Na 22.00 zapłanavany adjezd haściej.

Kamientary da artykuła