Zavieršana rasśledavańnie spravy ab vybuchu la viciebskaha KDB
Upraŭleńniem Śledčaha kamiteta pa Viciebskaj vobłaści zavieršana rasśledavańnie kryminalnaj spravy pa fakcie vybuchu kala budynka UKDB u Viciebsku.
Jak paviedamiła aficyjny pradstaŭnik USK pa Viciebskaj vobłaści Ina Harbačova, śledstvam ustanoŭlena, što 11 listapada 2012 hoda kala 19 hadzin kala administracyjnaha budynka ŭpraŭleńnia Kamiteta dziaržaŭnaj biaśpieki pa Viciebskaj vobłaści ŭčynieny vybuch samarobnaha vybuchovaha prystasavańnia.
Kančatkovaje abvinavačvańnie va ŭčynieńni złačynstva, praduhledžanaha č. 3 art. 339 KK (asabliva złosnaje chulihanstva), vystaŭlena raniej sudzimaj
42-hadovaj žycharcy Viciebska.
Pavodle słoŭ Iny Harbačovaj, u dziejańniach abvinavačvanaj śledčyja ŭhledzieli «vyklučna chulihanski matyŭ».
Padčas rasśledavańnia kryminalnaj spravy śledčymi zdabytyja nieabvieržnyja dokazy viny abvinavačvanaj. Praviedzienaja hienatypaskapičnaja ekśpiertyza vyjaviła poŭnuju adpaviednaść uziatych padčas ahladu miesca zdareńnia hienietyčnych śladoŭ uzoram, adabranym u abvinavačvanaj. U vyniku praviedzienaha ŭ jaje doma vobysku kanfiskavanyja pradmiety, jakija prama ŭkazvajuć na padrychtoŭčyja da hetaha złačynstva dziejańni. Dałučanyja da materyjałaŭ kryminalnaj spravy ŭ jakaści rečavych dokazaŭ kanfiskavanyja ŭ kvatery sšytak z rukapisnymi zapisami ab vybuchovych rečyvach i sposabach vyrabu vybuchovych sumiesiaŭ, niekalki samarobnych vybuchovych prystasavańniaŭ, anałahičnych kanstrukcyi, što była vykarystanaja pry ŭčynieńni złačynstva, pnieŭmatyčny pistalet, sypučyja rečyvy roznaj etymałohii.
Padčas vyvučeńnia asoby ŭstanoŭlena najaŭnaść u abvinavačvanaj sudzimaści za chulihanstva i paškodžańnie majomaści.U čas papiaredniaha śledstva pa kryminalnaj spravie žančyna poŭnaściu pryznała vinu va ŭčynieńni złačynstva, uziała ŭdzieł u praviadzieńni śledčaha ekśpierymientu, dzie padrabiazna apisała miechanizm vyrabu samarobnaha vybuchovaha prystasavańnia, a taksama śledčaha dziejańnia «pravierka pakazańniaŭ na miescy», padčas jakoha pry ŭdziele paniatych i vykarystańni videazapisu paetapna apisała paradak dziejańniaŭ na miescy ŭčynieńnia złačynstva.
Padčas rasśledavańnia ŭstanoŭlena datyčnaść abvinavačvanaj da ŭčynieńnia inšych złačynstvaŭ, kvalifikavanych śledstvam pa artykułach «Chulihanstva» i «Niezakonnyja dziejańni ŭ dačynieńni da vybuchovych rečyvaŭ».
U miežach rasśledavańnia praviedziena bolš za 700 dopytaŭ, pryznačanyja kala 270 sudovych ekśpiertyz, u tym liku ekśpiertnaj słužbaj Śledčaha kamiteta RF akazana praktyčnaja dapamoha ŭ praviadzieńni ekśpiertyzy pa palapšeńni jakaści videazapisu, uziataha ź miesca zdareńnia.
Materyjały kryminalnaj spravy pieradadzienyja ŭ prakuraturu Viciebskaj vobłaści dla nakiravańnia ŭ sud.