Bałachovič i bieł-čyrvona-bieły ściah na padpolnaj polskaj marcy

Na polskich internet-aŭkcyjonach hetaja marka sustrakajecca davoli rehularna.

Cana jaje nievysokaja — siahaje ad adnaho da troch dalaraŭ.

Nielehalnaja marka pryśviečanaja hienierału Stanisłavu Bułak-Bałachoviču i zmahańniu za biełaruskuju niezaležnaść. Na joj źmieščanaja čorna-biełaja vyjava atamana na kani, a taksama bieł-čyrvona-bieły ściah. Pad ściaham podpis — «Biełaruś, Polskaja pošta, 100 złotych». Jość taksama paznaka: «Ciapier pad savieckaj akupacyjaj». Marka hetaja była nielehalna vydadzienaja ŭ 1987 hodzie tahačasnym polskim rucham supracivu — Salidarnaściu.

«Biełaruskaja» marka pachodzić ź sieryi, pryśviečanaj inšym akupavanym respublikam SSSR, jakija zmahalisia za niezaležnaść i trapili pad hniot balšavikoŭ, — Litvie, Łatvii, Estonii, Ukrainie, Hruzii, Rasii.

Zrazumieła, što nielehalnyja marki polskaj Salidarnaści nie vydavalisia aficyjna, a drukavalisia ŭ pryvatnych tajemnych drukarniach. Za ich zachoŭvańnie možna było trapić pad sud.

Marki tyja adyhrali ŭ Polščy značnuju rolu ŭ baraćbie z kamunistyčnym režymam. Jany byli adnym ź simvałaŭ niepadparadkavańnia tahačasnym uładam. Prybytak ad prodažu marak pryznačaŭsia dla padtrymki tajemnych strukturaŭ Salidarnaści. Hrošy, atrymanyja ad prodažu išli, na vydańnie ŭlotak i inšych palihrafičnych materyjałaŭ.

Marki vydavalisia niecentralizavana ad pačatku vajennaha stanovišča. Ich rabili roznyja supołki Salidarnaści pa ŭsioj Polščy. Tamu marki roźniacca pa jakaści — isnujuć prosta kavałački hruboj papiery, addrukavanyja na rotapryncie, a jość i sapraŭdnyja kalarovyja šedeŭry z zubcami i na jakasnaj papiery.

Ličycca, što ahułam za čas vajennaha stanovišča ŭ Polščy było vydadziena da 35 tysiač vidaŭ marak, nakład jakich siahaŭ ad niekalki sotniaŭ da niekalki tysiač.

Kamientary da artykuła