Sabianin nabraŭ 50%, a Navalny pieramoh
abnaŭlajecca
Alaksiej Navalny śćvierdziŭsia jak lidar novaj rasijskaj apazicyi. Za jaho prahałasavała 28% žycharoŭ Maskvy.
Štab Alaksieja Navalnaha zajaŭlaje, što vybary nie buduć pryznanyja biez praviadzieńnia druhoha tura. Siarod pretenzij — padazronaje zaciahvańnie padliku hałasoŭ, a taksama zavialikaja ličba hałasavańnia pa kvaterach. Pramych falsifikacyj nakštałt ukidvańniaŭ biuleteniaŭ zafiksavana niašmat, adnak pry bałansavańni Siarhieja Sabianina na miažy 50% značeńnie moža mieć i sotnia ŭkinutych biuleteniaŭ. Tym bolš što kolkaść dziŭnych situacyj na ŭčastkach, dzie vyniki jašče nie byli padsumavanyja, rezka ŭzrasła. Chvalujučysia za kančatkovyja ličby, kiraŭniki kamisij pačali vyhaniać naziralnikaŭ. Na niekatorych učastkach paśla hetaha pačynaŭsia pieralik hałasoŭ.
Alaksiej Navalny zapłanavaŭ na 10 vieraśnia mitynh pratestu.
* * *
Niezaležnyja naziralniki za vybarami dasyłajuć fotazdymki z pratakołami hałasavańnia ŭ centralny štab. Zhodna ź infarmacyjaj prajekta «Hramadzianin naziralnik», atrymanaj z 59% učastkaŭ, Sabianin nabiraje 49,69% hałasoŭ, Navalny — 28,39%.
Hetyja dadzienyja mohuć minimalna ŭdakładniacca, adnak kolkaść učastkaŭ, adkul pryjšła infarmacyja, bolš raści nie budzie. Zatoje situacyja moža być zusim inšaj na ŭčastkach, kudy naziralniki trapić nie zmahli. U niekatorych turmach, śledčych izalatarach padtrymka ŭładnaha kandydata atrymlivajecca ahromnistaj.
«Na žal, vynik Sabianina blizki da 50%, a narmalnaja chibnaść našaha mietadu składaje adnu-dźvie dziesiatyja pracenta. I my nie zmožam adkazna zajavić, ci byŭ druhi tur ci nie», — zajaviŭ adzin z arhanizataraŭ alternatyŭnaha padliku Dźmitryj Areškin.
Aficyjnyja dadzienyja Masharvybarkama spačatku publikavalisia nie tak apieratyŭna, ale paśla «dahnali» naziralnikaŭ. Pavodle ich, apracavana 93% biuleteniaŭ. Sabianin nabiraje 51,11%, a ŭ Navalnaha — 27,42%. Dola vykanaŭcy abaviazkaŭ mera pa miery padliku hałasoŭ źmianšajecca, adnak nie nastolki, kab zvalicca nižej za «prachadnuju» miažu.
Jaŭka pry hetym zafiksavanaja nadzvyčaj nizkaja: 33,22%.
* * *
Alaksiej Navalny paćvierdziŭ teoryju praktykaj. Adziny kandydat ad apazicyi zdolny zrabić praryŭ navat u aŭtarytarnym hramadstvie. Na vybarach mera Maskvy takim adzinym kandydatam de-fakta byŭ antykarupcyjny błohier Alaksiej Navalny. Pobač ź im išli kandydaty-spojlery i psieŭdaapazicyja — jak ad partyi Žyrynoŭskaha, naprykład. Usie jany nabirajuć u miežach niekalkich pracentaŭ, tolki ŭ kamunista Mielnikava kala 10%. Navalny ža, pavodle roznych ekzit-połaŭ, źbiraje ad 29 da 36% hałasoŭ. Lidar hramadzianskaj apazicyi nikoli nie źbiraŭ tak šmat u pucinskuju epochu.
Pavodle sacyjołahaŭ, dziejny mer Siarhiej Sabianin źbiraje ad 45 da 55% hałasoŭ.
Vyniki padliku hałasoŭ stanuć viadomyja paźniej uviečary. Naziralniki nie vyklučajuć vuličnych pratestaŭ u vypadku, kali buduć vyjaŭlenyja fakty falsifikacyj.