Papa Francišak vykazaŭ zakłapočanaść losam zatrymanaha biełaruskaha ksiandza Łazara
AFP
U paniadziełak, 30 vieraśnia, Papa Francišak pryniaŭ na pryvatnaj aŭdyjencyi ŭ Vatykanie Apostalskaha Nuncyja ŭ Biełarusi arcybiskupa Kłaŭdya Hudžeroci. Padčas 40-chvilinnaj sustrečy Papa zatrymaŭsia nad žyćciom i pierśpiektyvami Biełarusi.
Asablivuju ŭvahu Pantyfik pryśviaciŭ situacyi Katalickaha Kaścioła ŭ Biełarusi, radujučysia prahresu ŭ słužbie Jevanhiellu na karyść usiaho biełaruskaha naroda i jaho kultury.
Akramia hetaha Pantyfik atrymaŭ usiu infarmacyju, jakoj vałodaje Apostalski Nuncyj, ab stanoviščy śviatara Uładzisłava Łazara, vykazvajučy svaju zakłapočanaść i prosiačy, kab jaho asabista rehularna infarmavali ab raźvićci hetaj situacyi.
Papa zapeŭniŭ ŭsiu katalickuju supolnaść krainy ŭ asablivaj blizkaści i ŭ svajoj asablivaj, baćkoŭskaj uvazie da hetaj dalikatnaj situacyi.
Pantyfik paprasiŭ svajho Pradstaŭnika ŭ Biełarusi pieradać usim hramadzianam krainy ciopłaje pryvitańnie i zapeŭniŭ u svajoj malitvie, pavazie i simpatyi.
U bližejšyja dni arcybiskup Kłaŭdya Hudžeroci sustreniecca z šeraham čynoŭnikaŭ Vatykana, paviedamlaje catholic.by.
Nahadajem, što biełaruskamu ksiandzu Uładzisłavu Łazaru stavicca ŭ vinu pieradača hrošaj i materyjalnych kaštoŭnaściaŭ čałavieku, jaki abvinavačvajecca ŭ špijanažy na karyść inšaj dziaržavy.
Jon abvinavačvajecca pavodle p. 1 art. 356 Kryminalnaha kodeksa (zdrada dziaržavie). Jaho kryminalnaja adkaznaść vyznačajecca p. 6 art. 16 KK (sadziejničańnie ŭ złačynstvie), što praduhledžvaje termin pakarańnia ad 7 da 15 hadoŭ. Ks. Łazar ŭtrymlivajecca ŭ turmie SIZA KDB u Minsku. Infarmacyju pra heta raspaŭsiudziła Kanfierencyja katalickich biskupaŭ Biełarusi, što adbyłosia 12 vieraśnia.
Z zatrymanym ksiandzom mieŭsia ŭ SIZA sustrecca nuncyj Hudžeroci.
Ksiondz Uładzisłaŭ Łazar — hramadzianin Biełarusi, vučyŭsia ŭ Hrodzienskaj sieminaryi, zatym u Polščy. U krasaviku hetaha hoda byŭ pryznačany administrataram z pravami probašča parafii Spasłańnia Duchu Śviatoha ŭ Barysavie. Raniej słužyŭ u Mar`inaj Horcy i Rudziensku (Puchavicki rajon Minskaj vobłaści).