U Breście pačalisia tradycyjnyja vosieńskija kirmašy
Samy vialiki kirmaš projdzie 19 kastryčnika — tam akramia płodaaharodninnaj pradukcyi možna budzie nabyć miasnuju i małočnuju pradukcyju, kansiervy, jajki i inšyja charčovyja tavary.
Jak paviedamiŭ BiełaPAN načalnik upraŭleńnia handlu i pasłuh harvykankama Jakaŭ Rodak, pieršyja kirmašy adkrylisia 5 kastryčnika ŭ troch miescach horada: na centralnaj vulicy Hohala, a taksama ŭ mikrarajonach Uschod (kala Pałacy kultury prafsajuzaŭ) i Vulka (kala rynku «Pryhraničny servis»).
Svaju pradukcyju tut realizujuć sielhaspradpryjemstvy, spažyŭkaapieracyja, fiermierskija haspadarki i rybhasy vobłaści. U Brest prybyło bolš čym 85 hruzavych aŭtamabilaŭ z aharodninaj i sadavinaj.
«Zvyčajna na pieršych takich kirmašach brestaŭčanie pryhladajucca da jakaści i cen. Chacia šerah haradžan ličyć za lepšaje adrazu ž zrabić usie nieabchodnyja zapasy na zimu», — adznačyŭ Rodak.
Usiaho ŭ Breście płanujecca praviadzieńnie 16 vosieńskich kirmašoŭ, jany buduć prachodzić pa subotach na praciahu ŭsiaho kastryčnika.
Dla zručnaści pakupnikoŭ u roznych častkach horada vyznačana 41 placoŭka dla realizacyi fiermierami svajoj pradukcyi nasielnictvu.
Letaś u Breście na vosieńskich kirmašach było pradadziena bolš čym dźvie tysiačy ton płodaaharodninnaj pradukcyi. Pakupnikoŭ takija kirmašy pryciahvajuć u pieršuju čarhu cenami, jakija zvyčajna nižejšyja, čym na rynkach i ŭ mahazinach.