Krynica ŭ Bruseli: Janukovič zamaroziŭ jeŭrapierśpiektyvy Uschodniaj Jeŭropy na šmat hadoŭ napierad
Janukovič zakryŭ mahčymaść jeŭraintehracyi dla Ukrainy na šmat hadoŭ i vyrašyŭ los usioj Uschodniaj Jeŭropy na 20-25 hadoŭ napierad. Takoje mierkavańnie ŭ kamientary internet-partału «Ukrainskaja praŭda» vykazała asoba z atačeńnia Fiule, jeŭrakamisara, adkaznaha za pašyreńnie ES.
Krynica była blizkaja da pieramovaŭ z ukrainskim bokam pa padrychtoŭcy da padpisańnia Damovy ab asacyjacyi ź ES. «Heta zamarožvańnie adnosin Ukrainy ź ES. Nie fakt, što kaliści ŭ blizkaj pierśpiektyvie možna budzie viarnucca da pieramovaŭ z Ukrainaj ab asacyjacyi. Na samoj spravie Janukovič zakryŭ mahčymaść jeŭraintehracyi dla Ukrainy na šmat hadoŭ, a moža, navat vyrašyŭ los Uschodniaj Jeŭropy na 20-25 hadoŭ i zamaroziŭ usie pracesy, jakija mahli tut adbyvacca, u tym liku reformy, demakratyzacyju, jeŭrapieizacyju i h.d.», – zajaviła krynica.
Kamientujučy admovu ŭrada Ukrainy praciahnuć padrychtoŭku da padpisańnia Asacyjacyi ź ES, jon padkreśliŭ, što «adzinym čałaviekam, ad jakoha zaležaŭ los Asacyjacyi byŭ Janukovič». Pa słovach krynicy, Janukovič «viedaŭ, što ES byŭ hatovy na kampramis u pytańni Cimašenki». Krynica śćviardžaje, što dla padpisańnia było dastatkova pryniać 2-3 jeŭrazakony, naprykład, pra vybary i prakuraturu.
«U paniadziełak padčas pasiadžeńnia savieta ministraŭ ES nichto adkryta nie vystupiŭ suprać. I navat skieptyki davali zrazumieć, što jany buduć hałasavać za asacyjacyju z Ukrainaj, bo Cimašenka pierakanała jeŭrapiejskich lidaraŭ nie zvažać na jaje, i ŭ zachodnich lidaraŭ jość jaje list ab hetym», – raspaviała krynica.
«Navat tyja krainy, jakija publična vystupali suprać, zhadžalisia stanoŭča prahałasavać», – dadaŭ jon.
Jašče ŭ aŭtorak Janukovič paviedamiŭ Fiule ab admovie padpisvać pahadnieńnie ab Asacyjacyi i prasiŭ adkłaści Asacyjacyju na hod. Jon patłumačyŭ heta ciskam Rasiei i vielmi vysokim koštam adaptacyi Pahadnieńnia, nazyvaŭ sumu ŭ 160 młrd dalaraŭ za 15 hadoŭ.
Fiule ž słaba zrazumieŭ ukrainskaha prezidenta, piša «Ukrainskaja praŭda».
«Fiule padumaŭ, što ŭkrainski prezident abo sapraŭdy admoviŭsia ad idei padpisańnia, abo prosta tarhujecca. Ale nadzieja jašče była, hetym i było vyklikana jaho aptymistyčnaje paviedamleńnie pa vynikach sustrečy», – paviedamiła krynica.
«Z punktu hledžańnia intaresaŭ Ukrainy Janukovič davoli dziŭna pavioŭ siabie, miakka kažučy. Navat kali kazać pra ekanamičnyja arhumienty, jon atrymaŭ harantyi i abiacańni vielmi vialikaj padtrymki i z boku ES, i z boku ZŠA. Ja dumaju, što sumy supastaŭnyja z tym, što prapanoŭvała Rasija», — ličyć krynica.
U 2010 hodzie paśla pieryjadu ekanamičnaha i infarmacyjnaha cisku Rasija zmusiła Alaksandra Łukašenku padpisać damovu pra Mytny sajuz, a paśla i pra Adzinuju ekanamičnuju prastoru.
Raniej u 2013 hodzie ad płanaŭ zbližeńnia ź Jeŭrasajuzam admoviłasia Armienija — na karyść Mytnaha sajuza.
Ćviorda prajeŭrapiejskim šlacham idzie maleńkaja i addalenaja ad Rasii Małdova, a taksama Hruzija, palityku jakoj źmianiŭ charyzmatyčny prezident Saakašvili. Dystancyju ad Rasii zachoŭvaje aŭtarytarny i bahaty na naftu j haz Azierbajdžan.
{POLL#156}