Janukovič: Ukraina idzie pa jeŭrapiejskim šlachu, i alternatyvy hetamu niama
+ poŭny tekst zvarotu
«Jak baćka nie moža pakinuć siamju biez chleba, tak i ja nie maju prava pakinuć ludziej na volu losu z tymi prablemami, jakija mohuć paŭstać, kali pad ciskam, jaki my adčuvajem, spynicca vytvorčaść, i miljony hramadzian buduć vykinutyja na vulicy».
Prezident Ukrainy Viktar Janukovič zajaviŭ, što ŭkrainskaje hramadstva budujecca na jeŭrapiejskich standartach i alternatyvy hetamu niama.
«Siońnia ja chacieŭ by padkreślić — alternatyvy pabudovie hramadstva jeŭrapiejskich standartaŭ na Ukrainie niama», - havorycca ŭ zvarocie kiraŭnika dziaržavy da ŭkrainskaha naroda, raźmieščanym na sajcie prezidenta ŭ paniadziełak.
Pa słovach prezidenta, reformy, jakija pravodziacca va Ukrainie - heta paćviardžeńnie taho, što «my idziem pa jeŭrapiejskim šlachu».
Prapanujem poŭny tekst zvarotu (pierakład sajta novychas.info)
«Pavažanyja suajčyńniki!
U bližejšy čas ja zrablu šyrokaje intervju na telebačańni i adkažu na ŭsie pytańni. A siońnia ja chacieŭ by padkreślić — alternatyvy pabudovie hramadstva jeŭrapiejskich standartaŭ va Ukrainie niama. I maja palityka na hetym šlachu zaŭsiody była i zastajecca paśladoŭnaj.
Reformy, jakija my ździajśniajem, — heta paćviardžeńnie taho, što my idziem pa jeŭrapiejskamu šlachu.
My budujem dziaržavu, u jakoj pravy čałavieka, roŭnaść usich pierad zakonam, prava vybaru, sacyjalnaja abarona źjaŭlajucca vyšejšymi kaštoŭnaściami dla ŭsich, biez adroźnieńnia, u jakim ty rehijonie pražyvaješ i na jakuju płošču vychodziš.
I jak prezident chacieŭ by zapeŭnić hramadzian Ukrainy — ja budu raźvivać i ŭmacoŭvać hetyja biassprečnyja padmurki našaha žyćcia.
U nas nichto nie ŭkradzie maru pra Ukrainu roŭnych mahčymaściaŭ, ab jeŭrapiejskaj Ukrainie. Hetak ža jak nichto nie sapchnie nas z praviednaj darohi, jakaja viadzie da hetaj mary.
My šmat prajšli, i jašče niamała nam prajści treba. Samymi składanymi na hetym šlachu byli, jość i zaŭsiody buduć ekanamičnyja prablemy.
Ale ja byŭ by niesumlennym i niespraviadlivym, kali b nie pakłapaciŭsia pra samych abiazdolenych i nieabaronienych, na jakich moža być uskładzieny asnoŭny ciažar pierachodnaha pieryjadu. Ja byŭ by, miakka kažučy, niapravy, kali b nie zrabiŭ usiaho, što treba zrabić, kab ludzi nie hublali pracoŭnyja miescy, kab jany atrymlivali zarobki i piensii, stypiendyi.
Ja chaču, kab u našaj vialikaj ŭkrainskaj siamji byŭ mir i spakoj. Jak baćka nie moža pakinuć siamju biez chleba, tak i ja nie maju prava pakinuć ludziej na volu losu z tymi prablemami, jakija mohuć paŭstać, kali pad ciskam, jaki my adčuvajem, spynicca vytvorčaść, i miljony hramadzian buduć vykinutyja na vulicy. Tamu mnie davodzicca źviartacca da niaprostych rašeńniaŭ. Tamu ja časam ryzykuju być niezrazumietym. I tamu ja prašu siońnia naš narod ŭvažliva vysłuchać mianie asabista.
Ja nikoli nie zrablu ni adnaho kroku ŭ škodu Ukrainie i narodu. Vola hramadzian Ukrainy była, jość i budzie vyrašalnaj dla kožnaha majho rašeńnia.
Ja chaču, kab ludzi viedali heta.
Ja dziakuju ŭsim za vysokuju hramadzianskuju śviadomaść. U intervju televizijnych kanałach ja bolš padrabiazna raspaviadu pra našyja sumiesnyja kroki i dziejańni, jakija my budziem rabić razam. Spadziajusia na razumieńnie i padtrymku.
Ja vieru — my pieraadolejem usie ciažkaści na šlachu raźvićcia našaj dziaržavy, tamu što niama takich pieraškod, jakija nie pieraadoleŭ by mudry i zhurtavany narod.
My nikoli i nikomu nie pavinny dazvalać pieraškadžać nam. Malitvy i mary miljonaŭ spadziajucca na Božuju volu».