Aŭtobus ź biełarusami, jaki jechaŭ ź Minska na Majdan, spynili praz hadzinu ŭ Marjinaj Horcy
abnoŭlena ŭ 00:52
fota z fb Valeryi Kustavaj
Zatrymańnie adbyłosia kala 21:00.
Niekalki dziasiatkaŭ biełarusaŭ mielisia siońnia naniatym čartarnym aŭtobusam vyjechać ź Minska, kab naviedać zaŭtra Kijeŭ i padtrymać udzielnikaŭ Jeŭramajdanu. Taksama ŭ subotu ŭ stalicy Ukrainy pavinny vystupić z hastrolnym kancertam «Lapisy» (Stereoplaza, 19:00).
U Kijeŭ aŭtobusam nakiroŭvalisia 53 čałavieki.
Jak paviedamiła Darja Katkoŭskaja «Našaj Nivie», u spynieńni aŭtobusa ŭ čystym poli prymali ŭdzieł supracoŭniki KDB, transpartnaj milicyi i DAI.
Z dakumientami va ŭsich (i na aŭtobus, uklučna z aptečkaj i vohnietušycielem) było ŭsio narmalna.
U pryvatnych hutarkach zaznačałasia, što pryčyna spynieńnia aŭtobusa — składanyja ŭmovy nadvorja, tamu jechać daloka nie rekamiendujecca.
Usie pasažyry admovilisia jechać u RUUS, i praz pole abviešanyja flikierami pajšli na bližejšuju AZS, dadała D. Katkoŭskaja.
Tym časam «zatrymoŭniki» i toj samy aŭtobus źjechali.
Pastupova ŭdzielniki pajezdki ciaham dvuch hadzin dziakujučy paputkam i dobrym ludziam ź Minska raźjechalisia. Pieryjadyčna ich naviedvali milicejskija patruli.
Pra vypadak pad Marjinaj Horkaj paviedamili viečaram z hałoŭnaj sceny Majdana ŭ Kijevie.
Prysutnyja na hałoŭnaj na siońnia płoščy stalicy Ukrainy ludzi ŭspryniali infarmacyju pra zatrymańnie ŭ Biełarusi z abureńniem. «Hańba», — kryčali jany.
10:00
Častka aktyvistaŭ i žurnalistaŭ taki dabrałasia da Ukrainy.