Kolkaść nasielnictva Minska vyrasła amal na 16,3 tys. čałaviek
Z pačatku 2013 hoda kolkaść nasielnictva Minska ŭ vyniku naturalnaha i mihracyjnaha pryrostaŭ pavialičyłasia na 16.285 čałaviek.
Pa stanie na 1 listapada hety pakazčyk skłaŭ 1 młn. 917,3 tys. čałaviek, paviedamlaje hałoŭnaje statystyčnaje ŭpraŭleńnie stalicy.
Naturalny pryrost nasielnictva ŭ Minsku za studzień—kastryčnik pavialičyŭsia ŭ paraŭnańni z takim ža pieryjadam 2012 hoda na 15,7% i skłaŭ 4.706 čałaviek.
Sioleta ŭ horadzie štodnia naradžałasia ŭ siarednim 64 dziciaci. Za 10 miesiacaŭ u Minsku naradziłasia 19.413 čałaviek, u toj čas jak pamierła 14.707. Takim čynam, lik narodžanych pieravysiŭ kolkaść pamierłych na 32% (za 10 miesiacaŭ 2012 hoda — na 27,8%).
Lik zarehistravanych šlubaŭ u studzieni—kastryčniku hetaha hoda ŭ paraŭnańni z anałahičnym pieryjadam minułaha pavialičyŭsia na 9,2%, kolkaść skasavańniaŭ šlubu pamienšyłasia na 4,9%. Na tysiaču šlubaŭ sioleta prychodzicca 439 skasavańniaŭ, tady jak za 10 miesiacaŭ minułaha hoda — 504.
«Adnym z najvažniejšych faktaraŭ, jakija ŭpłyvajuć nie tolki na kolkaść nasielnictva i jaho skład, ale i na mnohija sacyjalna-ekanamičnyja pakazčyki, źjaŭlajecca mihracyja nasielnictva», — adznačajuć u statupraŭleńni.
Za 10 miesiacaŭ hetaha hoda ŭ Minsk prybyło 36.405 čałaviek, vybyła 24.826 čałaviek. Mihracyjny pryrost skłaŭ 11.579 čałaviek i pieravysiŭ naturalny pryrost u 2,5 razu.
Asnoŭny abmien adbyvaŭsia pamiž stalicaj i abłaściami Biełarusi (89,1% ad liku ŭsich, chto pryjechaŭ, i 93,2% — vybyŭšych). Na dolu mižnarodnaj mihracyi pryjšłosia 10,9% ad ahulnaha liku pryjechaŭšych i 6,8% ad kolkaści vyjechaŭšych. Za 10 miesiacaŭ hetaha hoda ŭ Minsk pryjechali mihranty z 85 krain. Za taki ž pieryjad minčanie vyjechali z horada ŭ 58 krain.