Vice-premjer Prakapovič vystupiŭ z prahramnymi zajavami: pryvatnaja inicyjatyva nie ŭ pryjarytetach
U pałacie pradstaŭnikoŭ jon akreśliŭ asnoŭnyja kirunki raźvićcia ekanomiki na 2014 hod.
Vice-premjer Biełarusi Piatro Prakapovič vystupiŭ z prahramnymi zajavami ŭ pałacie pradstaŭnikoŭ. Pryvodzim vytrymku jarkich cytat.
Umovy pryvatyzacyi Mazyrskaha NPZ
U jakaści adnoj z umoŭ pryvatyzacyi Mazyrskaha naftapierapracoŭčaha zavoda Biełaruś prapanavała rasijskaj kampanii «Raśniefť» pavialičyć da 2020 hoda pastaŭki nafty ŭ Biełaruś da 20 miljonaŭ ton.
«Razmova idzie, kab častka nafty, jakaja pastaŭlajecca ŭ Jeŭropu, pierapracoŭvałasia ŭ Biełarusi i pradavałasia na ekspart»
Karovy jak vychad z kryzisu
«U vytvorčaści małaka jość vialikija reziervy, a my ŭžo dva hady topčamsia na miescy. Kali b my mahli siońnia mieć 2,5 miljona karoŭ, jak u 1992 hodzie, i kožnaja karova davała by 5000 litraŭ małaka, u nas by naohuł siońnia nijakich prablem u ekanomicy nie było».
Pa stanie na kastryčnik 2013 u Biełarusi naličvałasia 1 404 100 karoŭ. Značycca, Prakapoviču brakuje jašče adnaho miljona karoŭ.
Madernizacyja nierealnaja
«Madernizacyja nie adpaviadaje najaŭnym mahčymaściam. I pierš za ŭsio heta tyčycca ekanamičnaj madernizacyi».
Pavodle acenki Prakapoviča, płan pa madernizacyi paśpiachova realizujuć tolki 40% pradpryjemstvaŭ.
Pierakryžavanaje subsidavańnie budzie likvidavanaje
«Naśpieła nastojlivaja nieabchodnaść likvidavać pierakryžavanaje subsidavańnie dla pradpryjemstvaŭ».
Stavicca zadača vyrašyć pytańnie da 1 krasavika 2014 hoda, u tym liku za košt pryciahnieńnia resursaŭ ad vypusku ablihacyj.
Pakul nie da kanca jasna, pra što havorka. Dahetul pradpryjemstvy płacili za enierhiju pa zavyšanych taryfach, tady jak nasielnictva — pa zanižanych. Heta i było asnoŭnaje pierakryžavanaje subsidavańnie. Płanaŭ pavyšeńnia kamunałki dla ludziej nie ahučvałasia. Tamu, mahčyma, havorka pra panižeńnie taryfaŭ dla pradpryjemstvaŭ za košt pavieličeńnia dziaržaŭnych subsidyj.
Kredyty buduć viartać za košt novych kredytaŭ
«Staić zadača pa restrukturyzacyi zamiežnaj zapazyčanaści. U prajekcie biudžetu zapisana, što $2 miljardy my atrymajem za košt unutranych i zamiežnyich zapazyčańniaŭ. Ale ja dumaju, što heta budzie $2,6 miljarda. My pavinny vyrašyć hetuju zadaču, kab nie čapać zołatavalutnyja reziervy». Mienavita takuju sumu — $2,6 miljarda ŭ 2014 Biełaruś pavinna addać za staryja kredyty.
Taki padychod pryviadzie da rostu ahulnaj zamiežnaj zapazyčanaści Biełarusi, jakaja, imavierna, u 2014 pieravysić 40 miljardaŭ dalaraŭ.