Milicyjanty, jakich adpravili na bulbu, źlivali paliva z techniki
Pavodle padlikaŭ haspadarki, na praciahu troch miesiacaŭ adpraŭlenyja «na bulbu» supracoŭniki milicyi źlili paliva na 4 miljony rubloŭ.
Śledčy kamitet pačaŭ kryminalnuju spravu ŭ dačynieńni da dvuch supracoŭnikaŭ milicyi, jakija byli adpraŭlenyja ŭ sielhaspradpryjemstva na dapamohu va ŭborcy ŭradžaju, a zamiest hetaha źlivali dla ŭłasnych patreb dyzpaliva, paviedamlaje «Ježiednievnik».
Situacyja ŭ vyšejšaj stupieni aniekdatyčnaja, choć ciapier u anały postsavieckaha biełaruskaha humaru zanoś.
Pa-pieršaje, akazvajecca, što taki machrysty saviecki anachranizm jak adpraŭka «na bulbu», aktualny nie tolki dla biełaruskaj armii, sałdaty jakoj štohod adpraŭlajucca na paletki na dapamohu sielskim pracaŭnikam, ale navat dla supracoŭnikaŭ milicyi.
I heta pry tym, što ŭ MUS prajšło skaračeńnie i nibyta niezapatrabavanych supracoŭnikaŭ prybrali.
Akazvajecca, jość jašče ŭ biełaruskaj milicyi lišnija ludzi, jakimi całkam možna achviaravać dla bulby. Pryčym, nie na dzień-dva, a ažno na try (!) miesiacy.
Pa-druhoje, składana navat ujavić sabie vartaŭnikoŭ pravaparadku, jakich adpravili «na bulbu» i jakija stajać kala traktara i pry dapamozie šłanha źlivajuć dyzielnaje paliva.
Jak paviedamili «Ježiednievniku» ŭ Śledčym kamitecie, kryminalnaja sprava ŭ dačynieńni da supracoŭnikaŭ milicyi była raspačataja pavodle materyjałaŭ Hałoŭnaha ŭpraŭleńnia ŭłasnaj biaśpieki MUS.
Pavodle papiarednich dadzienych, u žniŭni 2013 inśpiektar DPS UDAI UUS Viciebskaha abłvykankama ŭ zvańni kapitana i kiroŭca HU «Aŭtahaspadarka MUS» byli adkamandziravanyja ŭ AAT «Kupała-Ahra», jakoje raźmieščana ŭ v.Hraničy Maładziečanskaha rajona. Adzin pavinien byŭ akazać sielskim pracaŭnikam dapamohu ŭ bitvie za ŭradžaj u jakaści traktarysta, a druhi — u jakaści kiroŭcy.
Adnak, akramia pracy ŭ poli, jany pieryjadyčna źlivali z techniki dyzielnaje paliva dla svaich asabistych metaŭ.
Pavodle padlikaŭ haspadarki, na praciahu troch miesiacaŭ adpraŭlenyja «na bulbu» supracoŭniki milicyi źlili paliva na 4 miljony rubloŭ.
Heta kala 500 litraŭ, abo pa 250 na kožnaha. Dadzienyja dziejańni pradstaŭnikoŭ MUS byli kvalifikavanyja Śledčym kamitetam jak ździajśnieńnie złačynstva pa č.2 211 KK (prysvajeńnie abo rastrata, učynienyja hrupaj asob pa papiaredniaj zmovie).
Sankcyja hetaha artykuła praduhledžvaje pakarańnie da 7 hadoŭ pazbaŭleńnia voli z kanfiskacyjaj majomaści.
U listapadzie supracoŭniki MUS byli zvolnienyja sa słužby za parušeńnie ŭmoŭ kantraktu. Zaraz idzie rasśledavańnie.