Na Aŭstraliju vypali sto tysiač dochłych kažanoŭ
U Aŭstralii z-za mocnaj śpiakoty stali masava pamirać latučyja myšy.
U štacie Kvinślend na paŭnočnym uschodzie krainy ŭ pačatku studzienia tempieratura pieravyšała 43 hradusy pa škale Celsija. Heta pryviało da taho, što ŭ štacie za niekalki dzion całkam vymierli 25 kałonij kažanoŭ, ahulnaja kolkaść jakich pieravyšała 100 tysiač asobin. Z-za śpiakoty bolšaść žyvioł hinuli niepasredna padčas palotu i padali na ziamlu.
Pa mienšaj miery 16 čałaviek źviarnulisia pa miedycynskuju dapamohu z-za ranieńniaŭ, naniesienych im kažanami. Ułady štata rekamiendavali žycharam nie ŭstupać u kantakt z žyviołami, kab paźbiehnuć zaražeńnia infiekcyjami.
Dla ŭborki trupaŭ kažanoŭ u bujnych haradach rehijonu ŭładami byli zadziejničany ŭzmocnienyja bryhady śmiećciaroŭ.
Da ciapierašniaha času tempieratura ŭ Kvinślendzie apuściłasia da narmalnych značeńniaŭ dla biahučaha siezona (u paŭdniovym paŭšarji ciapier siaredzina leta) i składaje 30—35 hradusaŭ Celsija.