21-hadovy sakratar mitr. Paŭła atrymaŭ za 40 dzion try ŭznaharody, jakija treba čakać jak minimum 9 hadoŭ
Dzimitryj Varłamaŭ uzhadvajecca va ŭsich navinach sajta BPC.
Błohierka Natalla Vasilevič (Burbalka) źviarnuła ŭvahu na fantastyčna imklivuju karjeru asabistaha sakratara mitrapalita Paŭła, 21-hadovaha Dzimitryja Varłamava.
Sakratar pryjechaŭ u Minsk uśled za Paŭłam.
Ijerej Dzimitryj Varłamaŭ naradziŭsia 5 lipienia 1992, i da svajho adjezdu ŭ Minsk źjaŭlaŭsia studentam 5 kursa Razanskaj pravasłaŭnaj duchoŭnaj sieminaryi.
Voś karotkaja chranałohija atrymańnia im uznaharod.
Paśviačeńnie na dyjakana: 27 kastryčnika 2013 (paśviedčańnie №934)
Paśviačeńnie na praśvitara: 24 listapada 2013 (paśviedčańnie №1017)
Pryznačany klirykam Kafiedralnaha sabora Naradžeńnia Chrystova: 25 listapada 2013 (ukaz №1018).
Uznaharodžany nabiedranikam: 1 śniežnia 2013.
Uznaharodžany kamiłaŭkaj [vysoki, cylindryčny hałaŭny ŭbor — NN]: 22 śniežnia 2013.
Pryznačany klirykam Jeparchijalnaha padvorka ŭ honar śviatoha praviednaha Iaana Kranštackaha: 22 śniežnia 2013 (ukaz №1064).
4 studzienia 2014 padčas pieršaha nabaženstva mitrapalita Paŭła i padčas prybyćcia ŭ rezidencyju — u ijereja Dzimitryja Varłamava užo byŭ uznaharodny nahrudny kryž.
Kab acanić chutkaść, paraŭnajem jaje z narmatyŭnaj, ukazanaj u Pałažeńni ab uznaharodach RPC:
2.3.2. Nabiedranik. Uznaharodžańnie adbyvajecca nie raniej čym praz try hady paśla chiratonii ŭznaharodžvajemaha.
U ijereja Dzimitryja prajšoŭ 1 tydzień.
2.3.3. Kamiłaŭka. Uznaharodžańnie adbyvajecca nie raniej čym praz try hady paśla ŭznaharodžańnia nabiedranikam.
U ijereja Dzimitryja prajšło 20 dzion.
2.3.4. Nahrudny kryž. Uznaharodžańnie adbyvajecca nie raniej čym praz try hady paśla ŭznaharodžańnia kamiłaŭkaj.
U ijereja Dzimitryja prajšło nie bolš za 13 dzion.
Ahułam zamiest 9 hadoŭ majem 40 dzion.
Dla nastupnaj ŭznaharody - sanu protaijereja - daviadziecca ŭsio ž pačakać, bo dla jaje patrabujecca ŭkaz patryjarcha, a taksama nie mienš za piać hadoŭ paśla ŭznaharodžańnia nahrudnym kryžam. Choć isnuje ahavorka, što «u vyklučnych vypadkach ŭznaharoda moža być dadzienaja i da zakančeńnia hetaha terminu».
Dzimitryj jeździć na ścipłym «Nisanie», ale lubić fatahrafavacca z bolš darahimi mašynami.
* * *
Ijerej Dzimitryj Varłamaŭ znachodzicca ŭ šlubie z Volhaj Varłamavaj (Ryžovaj), 1994 hoda naradžeńnia.