Rasija ŭ łatvijskich šprotach znajšła škodnyja rečyvy
U łatvijskich šprotach vyjaŭlena pieravyšanaje ŭtrymańnie kancerahiennaha rečyva bienzapirenu [jakoje raniej «znachodzili» va ŭkrainskich cukierkach Roshen — NN], rasijskija ŚMI spasyłajucca na spravazdaču Rasspažyŭnahlada, paviedamlaje lenta.ru
Dźmitryj Lekaj / Kommiersant'
ITAR-TASS udakładniaje, što pradukcyja była vypuščana kampanijami SIA Randa, Klavas, Rojas pagasts, Rojas novads.
Pa infarmacyi «Prajm», vytvorcam pradukcyi apynułasia adna kampanija — SIA Randa Klavas, i ŭ dačynieńni da jaje Raśsielhasnahlad uvioŭ režym ŭzmocnienaha łabaratornaha kantrolu.
Raśsielhasnahlad ŭžo vyjaŭlaŭ pieravyšanaje ŭtrymańnie bienzapirenu ŭ łatvijskich kansiervach niekalki hadoŭ tamu.
U pryvatnaści, u kastryčniku 2006 hoda Rasspažyŭnahlad zabaraniŭ impart šprotaŭ z-za pavyšanaha ŭtrymańnia kancerahiennych rečyvaŭ. Tahačasny kiraŭnik Rasspažyŭnahladu Hienadź Aniščanka śćviardžaŭ, što łatvijskija šproty nie adpaviadajuć ni rasijskim, ni jeŭrapiejskim standartam. U Ryzie rašeńnie ab zabaronie pradukcyi nazyvali palityčna matyvavanym.
Nahadajem, što ŭ žniŭni 2012 h. u Biełarusi, naadvarot, vybuchnuŭ skandał z rasijskimi bałtyjskimi kansiervami.
Paviedamlałasia, što bolš čym u 50 mahazinaŭ pa ŭsioj Biełarusi adnoj bujnoj handlovaj sietki pastupili niajakasnyja rybnyja kansiervy z adnoj partyi zvyš 200 tysiač štuk. Havorka išła pra «Sieladziec atłantyčny ŭ tamatnym sousie», «Sieladziec atłantyčny ŭ alei» i «Šproty ŭ alei z bałtyjskaj kilki», vyrablenymi na adnym pradpryjemstvie ŭ Kalininhradskaj vobłaści.