Abrad «Ciahnuć Kaladu na duba» budzie ŭniesieny ŭ Śpis suśvietnaj spadčyny
18 studzienia ŭ Biełaruskim dziaržaŭnym muziei narodnaj architektury i pobytu adbyłasia prezientacyja abradu «Ciahnuć Kaladu na duba», jaki zaviaršaŭ kaladnyja hulańni ŭ vioscy Noviny Biarezinskaha rajona Minskaj vobłaści.
Miascovyja žychary adradzili jaho ŭ 1998 hodzie, z taho času abrad kožny hod pravodzicca ŭ vioscy 21 studzienia.
«U vioscy Noviny Kaladoj słužyć pieršy zažynačny snop, — patłumačyła Anastasija Komlik, viadučy mietadyst pa falkłory Minskaha abłasnoha centra narodnaj tvorčaści. — U inšych vioskach heta mahło być draŭlanaje koła, barana ci jašče što-niebudź. Supracoŭniki kafiedry režysury Biełaruskaha dziaržuniviersiteta kultury, siabry studenckaha etnahrafičnaha tavarystva pačali cikavicca hetym abradam, pravodzić ekśpiedycyi na Biarezinščynu. I vyśvietliłasia, što na hałoŭnaje dreva — zvyčajna heta byŭ dub, ale zdarałasia, i inšaje dreva — ciahnuli Kaladu, kab na ŭsiu viosku raspaŭsiudziŭsia dabrabyt, kab byŭ dobry ŭradžaj. Hety dub źbiraŭ usiu enierhietyku i potym abaraniaŭ žycharoŭ ad niačyścikaŭ, davaŭ im moc, ščaście, zdaroŭje.
U 2011 hodzie abrad «Ciahnuć Kaladu na duba» ŭniesieny ŭ Dziaržaŭny śpis niemateryjalnaj historyka-kulturnaj spadčyny Biełarusi. Zaraz rychtujucca dakumienty na ŭniasieńnie jaho ŭ Śpis suśvietnaj spadčyny JUNIESKA».