Łukašenka: Zarpłata rasła nie ŭ adpaviednaści z pradukcyjnaściu pracy
Prezident źviarnuŭ uvahu na toj fakt, što ŭ minułym hodzie pry nievialikim roście VUP u 1 pracent siaredniaja zarabotnaja płata nasielnictva pa krainie vyrasła.
«Rost zarabotnaj płaty — heta dobra, ale ž i ceny ŭ nas raśli. Ja nie skažu, što my ludziej pastavili ŭ biazvychadnaje stanovišča, absalutna nie, ale tym nie mienš zarpłata rasła nie ŭ adpaviednaści z pradukcyjnaściu pracy. Heta danyja abjektyŭnyja, pryznanyja»,
— skazaŭ prezident. Pavodle jaho słoŭ, u 2013 hodzie dabrabyt hramadzian u siarednim palepšyŭsia, hrašovyja dachody nasielnictva vyraśli bolš jak na 17 pracentaŭ, u try razy pieravysiŭšy płan (6,5 pracenta), realny temp rostu dachodaŭ nasielnictva da dakryzisnaha 2010 hoda skłaŭ 140 pracentaŭ.
«Chtości ž i nie maje hetych $580 siaredniaj zarpłaty. Heta ja pryznaju. Dapuścim, u biudžetnaj śfiery zarabotnaja płata na $120 nižejšaja. Heta taksama niedapuščalna. Ale ja nie mahu za adzin raz biudžetnikaŭ padniać da 90 pracentaŭ realnaha siektara, jak heta zvyčajna ŭ nas było pryniata, i ŭ lepšyja hady tak było. Pacichu, viadoma, my ich padciahniem. I my heta siońnia robim. Ale ŭsio budzie zaležać ad ekanomiki», - adznačyŭ prezident.
«Havorać, kamuści było ciažka, kamuści nie vielmi, — ale heta tak. Amal 10 młn čałaviek tut žyvie i pracuje, u tym liku i zamiežnyja hramadzianie. Sapraŭdy, chtości atrymlivaŭ $1 tys., chtości — $300, piensijaniery, moža, navat krychu mienš. Usiakaje było. Ale jość siarednija pakazčyki, jany standartnyja va ŭsim śviecie», - skazaŭ Łukašenka. Na dumku prezidenta, $500 — heta toj siaredni dachod, za jaki ŭ Biełarusi možna žyć. «Heta kali pracuješ narmalna. A kali ty jašče sprabuješ dzieści padzarabić, to ty možaš i dźvie zarabotnyja płaty mieć. Tamu havaryć ab tym, što ŭ nas abvał z punktu hledžańnia dabrabytu nasielnictva, dachodaŭ nasielnictva, — niapravilna», — adznačyŭ Alaksandr Łukašenka.
«Nie treba zabyvać, što ŭ nas kožnaja druhaja siamja maje aŭtamabil, i nie adzin. Heta statystyka. I my tut apiaredzili bahaciejšuju Rasiju, — dadaŭ kiraŭnik dziaržavy. — Za $100 u nas možna kupić bolš, čym u Rasii, tut jašče i ŭzrovień žyćcia, ceny majuć važnaje značeńnie. Heta aficyjnyja dadzienyja. Bahatuju Rasiju abyšli».
«Tamu možna krytykavać nas, što heta nie adpaviadaje čyimści zapytam, — kožny čałaviek moža ab hetym skazać, i, napeŭna, jon maje racyju, ale treba bačyć i realnuju karcinu», — ličyć prezident. Pry hetym jon padkreśliŭ, što ŭsio budzie zaležać ad stanu ekanomiki.