Pamior lehiendarny śpiavak Pit Sihier
Učora ŭ ZŠA va ŭzroście 94 hadoŭ pamior vialiki fołk-śpiavak Pit Sihier, niastomny zmahar ź luboj niespraviadlivaściu ŭ śviecie, papularyzatar fołka, siabar Savieckaha Sajuza, jakomu fołkiery ŭsiaho śvietu musiać być udziačnyja za takija pieśni jak Where Have All the Flowers Gone i Goodnight, Irene.
Uźlot papularnaści Sihiera adbyŭsia ŭ 1940-ja, tady ž u śpievaka, jaki apynuŭsia zaciatym sacyjalistam pačalisia prablemy z palitykaj — usio ž taki u tyja časy ŭ ZŠA kamunistyčnyja pohlady, miakka kažučy, nie vitalisia. Pryblizna tady razam z hurtom The Weavers Sihier zapisvaje hałoŭnyja svaje pieśni, u tym kranalnuju liryčnuju, Goodnight, Irene.
Inšy chit Sihiera – lehiendarnaja Where Have All The Flowers Gone, jakuju možna pačuć choć na dabračynnym kancercie, choć u sacyjalnaj rekłamie, była ad pačatku…. ruskaj narodnaj. Adnojčy ŭ samalocie pa darozie na čarhovy kancer Pit Sihier čytaŭ raman «Cichi Don», dzie ŭbačyŭ tekst narodnaj pieśni pra kvietki, jakija źnikli, i vajskoŭcaŭ, jakija syšli na vajnu. Adrazu ž u samalocie i byŭ stvorany anhłamoŭny fołkierski standart.
Z Savieckim Sajuzam u Sihiera skłałasia siabroŭstva — u 1961 hodzie jon adyhraŭ dva kancerty ŭ Maskvie, a praz tryccać hadoŭ u padručnikach pa školnym pradmiecie «Muzyka» źjaviłasia dziŭnaja pa svaim pasyle fraza: «Pieśni «Bitłz» byli nastolki papularnymi, što ich vykonvaŭ navat Pit Sihier».
Ź išnaha boku, dla amierykanskich i jeŭrapiejskich fołkieraŭ Sihier staŭ sapraŭdnaj ikonaj – «hołas Amieryki» Brus Sprynhścin zapisaŭ albom z nazvaj We Shall Overcome: The Seeger Session. Upłyŭ Sihiera mocna zaŭvažny ŭ tvorčaści Džoan Baez, Raja Kudera, Arła Hatry, dy i badaj luboha śpievaka, jaki braŭsia za narodnyja pieśni.
Sam Sihier nie zvažajučy na ŭzrost hnuŭ svaju liniju – atrymlivaŭ «Hremi» za novyja albomy, i navat braŭ aktyŭny ŭdzieł u akcyi «Akupaj Uoł-stryt». A jahonaja pieśnia We Shall Overcome raz-poraz uspłyvaje jak čarhovy himn pratestoŭcaŭ pa ŭsim śviecie.