MZS ličyć mahčymym «pieravod dyjałohu ź ES i ZŠA ŭ kanstruktyŭnaje rečyšča»
Niahledziačy na «niaprosty mižnarodny kantekst, u cełym dasiahnutyja ŭ 2013 hodzie vyniki spryjali ŭmacavańniu źniešniepalityčnych pazicyj Biełarusi, rostu jaje aŭtarytetu na suśvietnaj arenie». Pra heta havorycca ŭ ahladzie vynikaŭ źniešniaj palityki Biełarusi i dziejnaści MZS u 2013 hodzie, apublikavanym 12 lutaha na sajcie źniešniepalityčnaha viedamstva.
Jak adznačajecca ŭ dakumiencie, mižnarodnaje stanovišča ŭ minułym hodzie zastavałasia niestabilnym i charaktaryzavałasia dynamičnymi hieapalityčnymi źmienami.
«Suśvietny ekanamičny kryzis niehatyŭna adbivaŭsia na šerahu dziaržaŭ i rehijonaŭ, uklučajučy važniejšych handlovych partnioraŭ Biełarusi, — havorycca ŭ dakładzie. — U hetych umovach mižnarodnaja aktyŭnaść Biełarusi była skiravanaja na zabieśpiačeńnie biaśpieki i abaronu nacyjanalnych intaresaŭ, a taksama na sadziejničańnie farmiravańniu spryjalnych pieradumoŭ dla ekanamičnaha raźvićcia krainy i pavyšeńnia dabrabytu hramadzian».
MZS taksama ŭkazvaje na «zruchi ŭ dyjałohu Biełarusi ŭ Jeŭrasajuzam i ZŠA», jakija «śviedčać pra mahčymaść jaho pieravodu ŭ kanstruktyŭnaje rečyšča».
«Pa vynikach 2013 hoda aznačylisia peŭnyja pazityŭnyja zruchi ŭ spravie narmalizacyi i raźvićcia adnosin ź ES, — skazana ŭ dakumiencie. — Značna aktyvizavalisia kantakty ź jeŭrastrukturami i źniešniepalityčnymi viedamstvami krain — členaŭ ES. Paśpiachova realizoŭvalisia prajekty techničnaha supracoŭnictva».
Važnym składnikam uzajemadziejańnia Biełarusi i ES u hetym hodzie ŭ MZS ličać pieramovy pa zaklučeńni pahadnieńniaŭ ab spraščeńni vizavaha režymu i readmisii. «Praciahnucca namahańni, skiravanyja na źniaćcie prablemnych pytańniaŭ u biełaruska-jeŭrapiejskich adnosinach», — havorycca ŭ dakumiencie.
Što datyčycca adnosin z ZŠA, to, jak adznačajecca ŭ ahladzie, «paśpiachovaja realizacyja bakami niekatorych prajektaŭ i inicyjatyŭ dazvalaje havaryć ab tym, što jość pieršyja pradvieśniki paciapleńnia atmaśfiery dvuchbakovaha supracoŭnictva».
«U śniežni byŭ arhanizavany pieršy za apošnija hady vizit u Biełaruś vysokapastaŭlenaj delehacyi Dziarždepartamienta ZŠA. Praviedzienyja pieramovy vyjavili ahulnaść pazicyj bakoŭ pa pytańniach, što ŭjaŭlajuć ŭzajemny intares», — skazana ŭ dakumiencie.
Nakont biełaruska-rasijskich adnosin adznačajecca, što «intensiŭny dyjałoh na vyšejšym i vysokim uzroŭniach dazvoliŭ vyjści na pryncypovyja damoŭlenaści ŭ roznych śfierach dvuchbakovaha ŭzajemadziejańnia».
Akramia taho, u 2013 hodzie Biełaruś «praciahvała aktyŭny ŭdzieł u raźvićci jeŭrazijskaha intehracyjnaha prajekta, naroščvała ŭzajemadziejańnie z krainami Mytnaha sajuza i Adzinaj ekanamičnaj prastory», nahadvaje MZS.
U ahladzie taksama ŭkazana na praciah aktyŭnaha supracoŭnictva Biełarusi z krainami SND, uzajemadziejańnie ź dziaržavami rehijona Afryki i Blizkaha Uschodu, Azii, Łacinskaj Amieryki.
MZS padkreślivaje, što Biełaruś tradycyjna aktyŭna ŭdzielničaje ŭ dziejnaści AAN i jaje śpiecyjalizavanych arhanizacyj i ŭstanoŭ. Akramia taho, raźvivałasia kanstruktyŭnaje sadziejničańnie z ABSIE i jaje strukturami. «Zachavałasia tendencyja na peŭnuju aktyvizacyju dyjałohu sa strukturami Savieta Jeŭropy», — adznačajecca ŭ ahladzie.
U minułym hodzie asablivaja ŭvaha ŭ pracy MZS i zamiežnych ustanoŭ tradycyjna nadavałasia akazańniu konsulskaj dapamohi biełaruskim hramadzianam, jakija trapili ŭ ekstremalnyja situacyi za miažoj, havorycca ŭ dakumiencie. «Najbolej składanyja situacyi, vyrašeńnie jakich patrabavała ad konsulskich słužbovych asob asablivaj uvahi i kompleksu mier, uźnikli, u pryvatnaści, va Ukrainie, Siryi, Pakistanie, Tanzanii, Uźbiekistanie, Abchazii, Mieksicy, Jemienie», — paviedamlaje MZS.
U ahladzie pryvodzicca statystyka vydačy biełaruskich viz, pavodle jakoj u 2013 hodzie było vydadziena 390.122 vizy dla 426.140 zamiežnych hramadzian i asob biez hramadzianstva.