Minzdaroŭja: U Biełarusi niama prablemaŭ z pastaŭkaj supraćpuchlinnych lekaŭ
U Biełarusi niama pierabojaŭ z supraćpuchlinnymi lekami. Pra heta paviedamiła siońnia žurnalistam načalnik adździeła lekavaha zabieśpiačeńnia Ministerstva achovy zdaroŭja Natalla Małaška, kamientujučy infarmacyju, jakaja źjaviłasia ŭ niekatorych ŚMI, što ŭ Biełarusi jość pieraboi z pastaŭkaj procipuchlinnaha preparata «Hiercepcin».
«U Biełarusi dastatkova procipuchlinnych lekaŭ. Preparat «Hiercepcin» jość i na składzie «Biełfarmacyi», i ŭ RNPC ankałohii. Užo zaklučana novaja damova na jaho pastaŭku. Heta darahija leki, paśla jakich niama čaho asabliva pryznačać, kali jany nie pracujuć», — skazała Natalla Małaška.
Jana padkreśliła, što pryjom lekaŭ adbyvajecca pad kantrolem miedrabotnikaŭ, paśla čaho robiacca analizy, i śpiecyjalisty hladziać, pracuje preparat ci nie.
«I kali doktar kaža pacyjentu, što leki nie dapamahajuć, jość ludzi, jakija razumiejuć hetyja słovy, a jość tyja, chto admaŭlajecca vieryć i hatovy pradać usio, što ŭ jaho jość, kab za ŭłasnyja srodki nabyć heta srodak. Ankałohija — heta strašnaje zachvorvańnie, i časam čałaviek, jaki ź im sutyknuŭsia, nie moža zrazumieć, što ŭ niekatorych vypadkach nivodny preparat nie dapamoža», — adznačyła śpiecyjalist.