Janukovič kapitulavaŭ, pryniaŭ usie ŭmovy paŭstancaŭ. Pasłańnik Pucina ŭciok
dapoŭniena
Piatnica, dzień: dziasiatki tysiač pratestoŭcaŭ na Majdanie słuchajuć vystup hrupy aficeraŭ milicyi, jakija publična pierajšli na bok naroda. Fota Rojterz.
Janukovič i try lidary parłamienckaj apazicyi padpisali ŭhodu ab vyvadzie Ukrainy z hłybokaha palityčnaha kryzisu. Heta adbyłosia ŭ Administracyi prezidenta na vulicy Bankavaj u Kijevie.
Dakumient zmacavali svaimi podpisami ministry zamiežnych spraŭ Polščy i Niamieččyny. Śpiecpasłańnik Pucina Uładzimir Łukin adsutničaŭ.
Pierad hetym pahadnieńnie ŭchvaliła Rada Majdanu. Jana dadała da jaho dźvie ŭmovy: ministr unutranych spravaŭ Zacharčanka i hienprakuror Pšonka musiać pakinuć svaje pasady.
Deputaty ad apazicyi supravadžajuć aŭtobusy z uschodnieŭkrainskim «Bierkutam», jakija pakidajuć ukrainskuju stalicu i kirujucca ŭ miescy svajoj pastajannaj dysłakacyi. Heta pačatak vykanańnia damoŭlenaściej.
Jak pieradajuć z Ukrainy, bierkutaŭcy nie chavajuć svajoj radaści.
Na praciahu hadziny paśla hetaha Viarchoŭnaja Rada viarnuła Kanstytucyju 2004 hoda. Taksama parłamient vyzvaliŭ ad adkaznaści ŭsich udzielnikaŭ padziej listapada-studzienia. Zaraz na praciahu piaci dzion majuć być admienieny 70 zakonaŭ, jakija stvaryli padmurak dla spaŭzańnia ŭ dyktaturu.
Apošnim zakonam, jaki prahałasavali ŭ piatnicu, byŭ akt pra dekryminalizacyju złačynstva, za jakuju była asudžanaja Julija Cimašenka. Prosta zaŭtra jana moža vyjści na svabodu.
Heta palityčnaja śmierć Viktara Janukoviča. Maralnaj jaho śmierciu było rašeńnie stralać u demanstrantaŭ.