«Pravy siektar» asudžaje cisk na siemji siłavikoŭ
Ukrainskaja arhanizacyja «Pravy siektar» asudžaje cisk na siemji siłavikoŭ i vystupaje suprać fizičnaj raspravy nad imi.
«My budujem novuju krainu, u asnovu raźvićcia jakoj buduć pakładzienyja nacyjanalnyja intaresy, spraviadlivaść, vysoki ŭzrovień marali. Mienavita tamu «Pravy siektar» niehatyŭna stavicca da cisku na siemji siłavikoŭ», — havorycca ŭ zajavie palitrady «Pravaha siektara».
Jak kažuć u arhanizacyi, usie vinavatyja pavinny być pakaranyja, heta budzie tyčycca «i siemjaŭ złačyncaŭ u vyhladzie kanfiskacyjaŭ i hrašovych spahnańniaŭ». «Adnak pahrozy fizičnaj raspravy, na našu dumku, źjaŭlajucca niedapuščalnymi», - zajaŭlajuć u «Pravam siektary».
«My — revalucyjna azdaroŭlenaje ŭkrainskaje hramadstva — pavinny prademanstravać, što padnialisia na prystupku vyšej u maralnym płanie. Niachaj naš spraviadlivy hnieŭ i žadańnie spraviadlivaści nie pieratvarajucca ŭ ślapuju nianaviść», — havorycca ŭ zajavie.
«Pravy siektar» taksama źviartaje ŭvahu na toje, što zaraz pad ciskam hramadstva «znachodziacca siemji asobnych sumlennych siłavikoŭ, i heta źjava pavinna źniknuć». Palitrada taksama adznačaje, što jašče padčas supraćstajańnia na Hrušeŭskaha ŭ studzieni hetaha hoda jany zajaŭlali, što nie buduć pomścić siemjam, i hetaha pryncypu prytrymlivajucca i ciapier.