Majdan stavić novy ŭltymatum
Sotnik Uładzimir Parasiuk, jaki viečaram 21 lutaha pastaviŭ ultymatum Janukoviču z patrabavańniem pajści ŭ adstaŭku, paśla abviaščeńnia siońnia viečaram, 26 lutaha, na Majdanie Niezaležnaści budučaha składu Kabmina vyjšaŭ da mikrafona i zaklikaŭ Majdan nie razychodzicca, pakul nie stabilizujecca situacyja ŭ krainie.
«Ja stajaŭ za scenaj i čuŭ vašu reakcyju na toje, što jany (palityki) tut rabili. Heta była sapraŭdnaja kłaŭnada. Niekatoryja z tych ludziej niekalki dzion tamu skazali, što Majdan pavinien razyścisia. Ale Majdan nie razydziecca. Bo my budziem tym kantralujučym orhanam, kab jany viedali, što kali jany nam zdradziać, my pryjdziem da kožnaha asabista i spytajem, za što zahinuli našy chłopcy — hieroi Ukrainy», — zajaviŭ sotnik.
«My ŭsie razumiejem: u krainie treba navodzić paradak. Krainie patrebny ŭrad. Krainie treba ministry. Vy pahladzicie, što adbyłosia: tam (u novym składzie Kabiniecie ministraŭ) hodnyja ludzi, ale jość i niavartyja ludzi», — skazaŭ jon.
«Ale, u pieršuju čarhu, nam treba razumieć, što pavinien być žorstki kantrol na ŭsich uzroŭniach ułady — ad pasiałkovaj da Viarchoŭnaj. I nie davać im spusku!» — zajaviŭ Parasiuk.
Hetyja słovy ludzi burna padtrymali.
«Prašu, kab Majdan nikudy nie razychodziŭsia, pakul nie stabilizujecca situacyja ŭ krainie. Pakul nie buduć vykanany ŭsie našy patrabavańni.
I zapomnicie, palityki: vy słuhi naroda, tamu, kali łaska, słužycie nam. A kali vy hetaha nie zrobicie, tady my pryjdziem vam na zamienu», — dadaŭ jon. Majdan padtrymaŭ i hety zaklik.
Paźniej Parasiuk vykazaŭsia z nahody pryznačeńnia Arsiena Avakava v.a. kiraŭnika MUS.
«Pavažanyja suajčyńniki, ščyra, ja nie čuŭ, što Avakaŭ — ministr unutranych spraŭ. Ja hetaha jak hramadzianin Ukrainy nie dapušču. Mnie sumleńnie nie dazvolić. Bo palehli našyja braty, i ź pieršych dzion Avakaŭ pavinien byŭ sadžać usich zapar. Tamu ja asabista suprać», — zajaviŭ jon.
«Jany majuć jašče cełuju noč. Chaj dumajuć, chaj vyrašajuć.
Jość vielmi šmat hodnych ludziej, jakija mohuć ŭznačalić hetaje ministerstva Tamu kali jany nas čujuć, to pierad Niabiesnaj sotniaj [tak nazyvajuć palehłych 18—20 lutaha] zaŭtra ministr pavinien być inšy», — skazaŭ Parasiuk, i ludzi jaho burna padtrymali.