Rasiejskija čynoŭniki atrymali kanviert z paraškom: 18 čałaviek — u špitali
Kanviert ź biełym paraškom dasłali ŭ administracyju Chanty-Mansijskaj aŭtanomnaj akruhi.
Siarod paciarpiełych - čynoŭniki aparata hubiernatara i piaciora palicejskich, jakich zaprasili prysutničać pry ŭskryćci padazronaha kanvierta.
Kanviert ź niebiaśpiečnym rečyvam 28 sakavika ŭ budynak urada prynios nieviadomy kurjer. Čynoŭniki pryniali karespandencyju, raśpisalisia ŭ atrymańni. Na kanviercie nie byŭ paznačany kankretny adrasat, i kanviert paličyli padazronym. Ludzi, jakija pracujuć va ŭradzie, vyklikali palicyju, kanviert raskryli. Paśla hetaha 18 čałaviek byli špitalizavanyja ŭ infiekcyjnaje adździaleńnie balnicy Chanty-Mansijska. Simptomy nie paviedamlajucca.
Parašok adpraŭleny na ekśpiertyzu ŭ Ciumień. Pavodle infarmacyi ura.ru, parašok pakul paśpieli pravieryć tolki na radyjacyju, nijakaha vypramieńvańnia nie zafiksavana.
Na kanviercie byŭ paznačany adras adpraŭnika ŭ horadzie Uraj, adkul list adpraŭleny 24 sakavika. Śledčaja hrupa, zrešty, miarkuje, što hetyja ludzi nie majuć dačynieńnia da adpraŭleńnia lista. Ale, u kvatery ŭziali ŭzory ŭsich paraškoŭ, šarykavych ručak, a ŭ žycharoŭ - uzory počyrku.
Pradstaŭniki ŭrada CHMAO aficyjna abviarhajuć fakt NZ. Jak zajaviła pres-sakratarka i pamočnica hubiernatara Alena Šumakova, toje, što adbyłosia - častka «šmatstupieńčataj treniroŭki», jakaja arhanizavanaja va ŭradzie akruhi.