Hieorhija Stankieviča ź Biešankovičaŭ sudzili za raspaŭsiud haziety «Kryvinka»
Siabra HA «Biełaruskaja asacyjacyja žurnalistaŭ» Hieorhij Stankievič byŭ pryciahnuty da suda za parušeńnie zakanadaŭstva ab ŚMI.
Pavodle składzienaha na nastaŭnika milicejskaha pratakoła, jon parušaje praviły raspaŭsiudu haziety «Kryvinka», jakuju zasnavaŭ i vydaje na ŭłasnyja srodki.
2 krasavika sudździa Biešankovickaha rajonnaha suda Natalla Reŭt admoviłasia pieranieści praces na inšy dzień, choć Hieorhij Stankievič paviedamiŭ, što abrany im advakat zmoža pryjechać u Biešankovičy nie raniej za piatnicu. Redaktaru «Kryvinki» było prapanavana zaklučyć damovu ź miascovym abaroncam, adnak jon na heta nie pahadziŭsia:
—Ja chacieŭ mieć abaroncu, jaki raźbirajecca ŭ zakanadaŭstvie ab ŚMI. I siabry-BAŽaŭcy dapamahli ŭ hetym, znajšli takoha śpiecyjalista, ale ŭ Minsku. Pakolki pozvu ŭ sud mnie ŭručyli tolki ŭ dzień suda, ja fizična nie moh pajechać u Minsk dy zaklučyć z advakatam damovu. Adnak mienavita na tym, kab ja takuju piśmovuju damovu pakazaŭ, nastojvała sudździa.
Hetaksama sudździa nie zadavoliła chadajnictva vydaŭca pra prysutnaść pierakładčyka na pracesie. Hieorhi Stankievič niekalki razoŭ pierapytvaŭ, što kaža sudździa. Adnak Natalla Reŭt adznačyła, što svaimi patrabavańniami pierakładać na rodnuju movu jon tolki sprabuje zamarudzić sudovy praces. Urešcie sudździa ŭvohule vyhnała jaho z sudovaj zały, abvinavaciŭšy ŭ parušeńni pravaparadku, — paśla taho, jak Hieorhi Stankievič niekalki razoŭ abviaściŭ joj advod, a potym paprasiŭ zrabić pierapynak na 15 chvilin, kab padać skarhu na parušeńnie jahonych pravoŭ staršyni suda.
Śviedak — dvuch pradprymalnikaŭ, jakija na miascovym kirmašy atrymali hazietu «Kryvinka» ad Hieorhija, sudździa zasłuchvała sam-nasam.
Za parušeńnie častki 2 artykuła 22.9 Kodeksa ab administracyjnych pravaparušeńniach Hieorhiju Stankieviču pahražaje štraf pamieram da 50 bazavych vieličyń. Darečy, heta ŭžo treciaje abvinavačańnie takoha kštałtu. Za parušeńnie praviłaŭ raspaŭsiudu ŚMI jon byŭ pakarany ŭ 2010 hodzie (štraf 20 bazavych vieličyń) i ŭ 2012 hodzie (štraf 40 bazavych vieličyń).
Sam Stankievič ličyć, što sprava suprać jaho — heta palityčnaja zamova z metaju abmiežavać jahonym ziemlakam dostup da praŭdzivaj infarmacyi:
— Hazieta «Kryvinka» vydajecca na maje ŭłasnyja srodki, vychodzić niepieryjadyčna, nakładam 290 asobnikaŭ. Tamu jana nie padlahaje rehistracyi. Ja drukuju miascovyja naviny i naviny z usiaje Biełarusi, krytyčnyja i analityčnyja materyjały. Heta vielmi nie padabajecca tym, chto chacieŭ by zrabić vyhlad, što ŭ nas usio spakojna i padstavaŭ dla krytyki niama, — havoryć zasnavalnik vydańnia.