Na čym pahareŭ pieršy namieśnik ministra lasnoj haspadarki?
Fota: BiełaPAN
Pastanovaj Savieta ministraŭ pieršy namieśnik ministra lasnoj haspadarki Fiodar Lisica vyzvaleny ad zajmajemaj pasady ź niepryjemnaj farmuloŭkaj.
U dakumiencie za №307 ad 4 krasavika paviedamlajecca, što vysokapastaŭleny čynoŭnik zvolnieny na padstavie padpunkta 1.4 punkta 1 art. 40 zakona « Ab dziaržaŭnaj słužbie» — nievykanańnie abmiežavańniaŭ, źviazanych ź dziaržaŭnaj słužbaj. Farmuloŭka raspłyvistaja, adnak hučyć jak prysud dla słužbovaj karjery.
Na čym ža pahareŭ čynoŭnik, na pryznačeńnie jakoha 3 vieraśnia 2010 hoda davaŭ zhodu prezident? (Treba mierkavać, što i vyzvaleńnie ad pasady adbyłosia nie bieź jaho viedama). Ci niama tut suviazi z razhladam skandalnaj spravy vakoł budaŭnictva doma ŭ «zabaronienych Drazdach»?
Pavodle aficyjnaj viersii, pieršy namieśnik ministra žyŭ u słužbovaj kvatery i mieŭ patrebu ŭ palapšeńni žyllovych umovaŭ. U studzieni 2010 hoda z metaj budaŭnictva žylla dla supracoŭnikaŭ viedamstva byŭ utvorany kaapieratyŭ. Spačatku Lisica ad udziełu ŭ budaŭnictvie kvatery admoviŭsia. Ale paźniej, kali na padstavie pravierak KDK i Hienprakuratury z ŽBVK roznymi sposabami «syšli » paŭtara dziasiatka členaŭ kaapieratyva, jakija nibyta nie mieli prava «budavacca», čynoŭnik ŭsio ž napisaŭ zajavu na siabroŭstva ŭ ŽBVK. A potym pa nieviadomych pryčynach admoviŭsia ad kvatery ŭ hetym domie.
Takija voś niepaśladoŭnyja rašeńni … Nie vyklučana, što tym samym jon pryciahnuŭ da siabie ŭvahu z boku kampietentnych orhanaŭ, jakija vyrašyli pravieryć jaho dabrabyt. U vyniku praviarajučyja vyjavili niekalki abjektaŭ nieruchomaści, da jakich, pavodle vynikaŭ pravierki, «biazdomny čynoŭnik» mieŭ ŭskosnaje i navat pramoje dačynieńnie.
Pa źviestkach Naviny.by, na pieršapačatkovym etapie pravierku ŭ dačynieńni da Lisicy pravodziŭ Kamitet dziaržkantrolu. Zatym hetaj historyjaj zanialisia supracoŭniki Hałoŭnaha ŭpraŭleńnia pa baraćbie z arhanizavanaj złačynnaściu i karupcyjaj MUS. Tak što, mahčyma, vyzvaleńnie ad pasady pieršaha namieśnika ministra — tolki šmatkropje ŭ hetaj zabłytanaj spravie.
Daviedka: Fiodar Lisica naradziŭsia 2 traŭnia 1963 hoda ŭ Salihorsku Minskaj vobłaści. U 1986 hodzie skončyŭ lesahaspadarčy fakultet Biełaruskaha technałahičnaha instytuta, u 2007 hodzie — Akademiju kiravańnia pry prezidencie Respubliki Biełaruś. U 1986 — 2000 hady pracavaŭ laśničym Jaskovičskaha laśnictva, vykonvajučym abaviazki dyrektara DŁHU «Starobinski lashas». Z 2000 hoda — dyrektaram DŁHU «Starobinski lashas». 6 vieraśnia 2010 h pastanovaj Savieta ministraŭ pryznačany pieršym namieśnikam ministra lasnoj haspadarki. Vyzvaleny ad hetaj pasady 4 krasavika 2014 h.