«Kommiersant»: Łukašenka i Maziepin nie damovilisia
Alaksandr Łukašenka i namieśnik staršyni savieta dyrektaraŭ AAT «Urałkalij» Dźmitryj Maziepin na sustrečy 18 krasavika ŭ Minsku nie zmahli damovicca ab adnaŭleńni raboty sumiesnaha trejdara z-za niesupadajučych umoŭ dvuch bakoŭ.
Ab hetym paviedamlaje «Kommiersant» sa spasyłkaj na svaje nienazvanyja krynicy.
fota kommersant.ru
Nahadajem, 18 krasavika ŭ Minsku adbyłasia pieršaja sustreča Alaksandra Łukašenki z uładalnikam «Urałchima», namieśnikam staršyni savieta dyrektaraŭ AAT «Urałkalij» Dźmitryjem Maziepinym. Heta pieršyja aficyjnyja pieramovy kiraŭnictva kampanii z uładami Biełarusi z momantu źmieny akcyjanieraŭ «Urałkalija» ŭ kancy 2013 hoda.
Łukašenka nazvaŭ sustreču «ŭ niejkaj stupieni histaryčnaj paśla taho, što adbyłosia ŭ adnosinach z byłym akcyjanieram». Baki pryjšli da vysnovy, što razryŭ ahulnaha trejdynhu «Urałkalija» z «Biełaruśkalijem» i padzieńnie cen na kalij nie pajšli na karyść ni kampanijam, jakija rezka źnizili prybytak u 2013 hodzie, ni rynku.
Ale krynicy «Kommiersanta», znajomyja ź situacyjaj, adznačajuć, što nijakaha kankretnaha rašeńnia na sustrečy pryniata nie było i varyjanty dalejšaha supracoŭnictva nie abmiarkoŭvalisia. Pavodle ich słoŭ, heta była «dekłaracyja ab namierach», jakaja pavinna była prademanstravać paciapleńnie adnosinaŭ paśla źmieny akcyjanieraŭ. Pieramovy ab adnaŭleńni sumiesnaha trejdynhu, kali jany buduć, projduć na rabočym uzroŭni pamiž «Urałkalijem» i «Biełaruśkalijem».
Krynica «Kommiersanta» na rynku adznačyła, što asnoŭnaje patrabavańnie rasijskaj kampanii da novaha trejdara — jaho rehistracyja ŭ Rasii i raździaleńnie dolej u prodažy parytetna vytvorčaści (heta značyć kala 65% na 35% na karyść «Urałkalija»).
U 2013 hodzie vytvorčaść «Urałkalija» skłała 10 młn. ton, «Biełaruśkalija» — kala 6,5 młn. ton.
Krynicy «Kommiersanta» na rynku sumniavajucca, što ŭ najbližejšy čas pačnucca aktyŭnyja pieramovy pa stvareńni trejdara, «pakul vysoki siezon prodažu i na rynku jość popyt, kampanii mohuć pracavać i asobna». Adzin z surazmoŭcaŭ «Kommiersanta» adznačaje, što pytańnie moža aktyvizavacca pa druhim paŭhodździ 2014 hoda, kali budzie zrazumieła, što Biełaruś nie moža pradać svaje abjomy.