Łukašenka prapanavaŭ Pucinu pravieści sumiesny parad na Krasnaj płoščy
Alaksandr Łukašenka prapanavaŭ Uładzimiru Pucinu padumać ab praviadzieńni parada rasijskich i biełaruskich vajskoŭcaŭ na Čyrvonaj płoščy ŭ honar 70-hodździa Pieramohi ŭ Vialikaj Ajčynnaj vajnie ŭ nastupnym hodzie. Takuju zajavu biełaruski kiraŭnik zrabiŭ u chodzie dvuchbakovaj sustrečy z rasijskim kaleham.
«Ja dumaju, nam pryjdziecca padumać ab tym, kab na paradzie biełarusy i rasijskaja armija prademanstravali heta (adzinstva). Dumaju, heta budzie narmalna, kali na Čyrvonaj płoščy našy padraździaleńni buduć prymać udzieł (u paradzie)», — skazaŭ Łukašenka na sustrečy z Pucinym.
Akramia taho, Łukašenka prapanavaŭ Pucinu skaardynavać sumiesnyja dziejańni ŭ suviazi ź situacyjaj va Ukrainie: «Mnie chaciełasia b, tak by mović, za kadram, adkryta pahavaryć ab situacyi va Ukrainie i niejak skaardynavać našy dziejańni. Tamu što, napeŭna, hety kryzis zaŭtra nie skončycca, a jon niepasredna ŭpłyvaje jak na vas, tak i na nas».
U chodzie sustrečy taksama płanujecca abmierkavańnie pierśpiektyŭ stvareńnia Jeŭrazijskaha ekanamičnaha sajuza pa vynikach kansultacyj na mižuradavym uzroŭni.
«My praviali vielmi vialikuju pracu i z premjer-ministram Dźmitryjem Anatoljevičam (Miadźviedzievym), ź vice-premjerami i ź ministrami. Vielmi vialiki płast raboty pa ŭzhadnieńni niekatorych momantaŭ našaha dahavora ab Jeŭrazijskim ekanamičnym sajuzie», — skazaŭ Łukašenka.
Pucin padziakavaŭ Łukašenku za vizit u Maskvu napiaredadni Dnia Pieramohi. «Viedaju, što vy zaraz rychtujeciesia i da hetaha śviata, i da čempijanatu śvietu pa chakiei, spraŭ šmat, tym nie mienš vy znajšli čas, pryjechali. Mnie zdajecca, heta naturalna. Rasija i Biełaruś, jak byłyja składovyja častki Savieckaha Sajuza, unieśli vialiki układ i panieśli vielizarnyja straty ŭ baraćbie z nacyzmam. Tamu być u hetyja dni razam — naturalnaja sprava», — adznačyŭ prezident Rasii.