Vakalisty ź piaci krain udzielničajuć u konkursie imia Maniuški «Ubielskaja łastaŭka»
Vakalisty ź piaci krain biaruć udzieł u II Adkrytym konkursie studentaŭ-vakalistaŭ vyšejšych muzyčnych navučalnych ustanoŭ imia S. Maniuški «Ubielskaja łastaŭka». Pra heta paviedamiŭ načalnik adździeła narodnaj tvorčaści, kulturnaj dziejnaści i ŭstanoŭ adukacyi hałoŭnaha ŭpraŭleńnia ideałahičnaj raboty, kultury i pa spravach moładzi Minabłvykankama Jaŭhien Astašoŭ.
U konkursie prymajuć udzieł 26 vakalistaŭ z vyšejšych muzyčnych navučalnych ustanoŭ Biełarusi, Litvy, Rasii, Ukrainy i Čechii, a taksama 10 navučencaŭ siarednich śpiecyjalnych navučalnych ustanoŭ Biełarusi. Kankursantam treba budzie vykanać niekalki tvoraŭ, u tym liku kłasičnuju aryju, narodnuju pieśniu, tvor kampazitara krainy, jakuju pradstaŭlaje ŭdzielnik, aryju, ramans, pieśniu S. Maniuški. Pieramožcaŭ abvieściać 11 maja. Łaŭreat pieršaj premii atrymaje $1,5 tys., druhi — $1 tys., treciaj — $500. Hrašovaje ŭznaharodžańnie taksama čakaje troch dypłamantaŭ i pieramožcy ŭ naminacyi «Pryz za lepšaje vykanańnie tvora S. Maniuški».
Zaklučny hała-kancert z udziełam pieramožcaŭ konkursu, salistaŭ Nacyjanalnaha akademičnaha Vialikaha teatra opiery i baleta Biełarusi, vykładčykaŭ Biełaruskaj dziaržaŭnaj akademii muzyki i akademičnych kalektyvaŭ Minskaj vobłaści adbudziecca 12 maja ŭ Červieni. U miascovym krajaznaŭčym muziei razhorniecca vystava, pryśviečanaja žyćciu i tvorčaści Stanisłava Maniuški. Tut ža možna budzie ŭbačyć ekspanaty, źviazanyja z konkursam «Ubielskaja łastaŭka».
Zavieršycca prahrama liryka-kamiedyjnaj opieraj Stanisłava Maniuški «Verbum Nobile» («Słova honaru»). Suśvietnaja premjera opiery adbyłasia ŭ 1861 hodzie ŭ Varšavie, dzie ŭ toj pieryjad žyŭ i pracavaŭ muzyka. Vytančany kamiedyjny siužet i jarkaść muzyčnych vobrazaŭ prynieśli śpiektaklu pośpiech i pastavili opieru ŭ šerah lepšych tvoraŭ kampazitara.
Arhanizatary konkursu — hałoŭnaje ŭpraŭleńnie ideałahičnaj raboty, kultury i pa spravach moładzi Minabłvykankama, ustanova «Zasłužany kalektyŭ Respubliki Biełaruś «Biełaruski dziaržaŭny akademičny muzyčny teatr», adździeł ideałahičnaj pracy, kultury i pa spravach moładzi Červieńskaha rajvykankama.