Kančyta Vurst nie pryjedzie na «Słavianski bazar u Viciebsku»
Kančyta Vurst nie budzie prymać udzieł u kancertach XXIII Mižnarodnaha fiestyvalu mastactvaŭ «Słavianski bazar u Viciebsku». Pra heta siońnia paviedamiŭ žurnalistam dyrektar dyrekcyi fiestyvalu Alaksandr Sidarenka.
«Jość tradycyja załučać u Viciebsk tryumfatara «Jeŭrabačańnia», i my zahadzia abmiarkoŭvajem hetyja pytańni praz našych partnioraŭ u Jeŭropie: viadziem razmovu z mnohimi patencyjalnymi pieramožcami hetaha konkursu na pradmiet ich udziełu ŭ našym feście.
Pry ŭsim hetym nielha stavić na adnu liniejku «Słavianski bazar» i «Jeŭrabačańnie». Heta zusim roznyja mierapryjemstvy pa svaim sensie, idejach i metach. U nas u pieršuju čarhu aceńvajecca vakalnaje majsterstva. Pieramožca hetaha hoda niadrenna śpiavaje, ale heta nie lepšy ŭdzielnik. «Jeŭrabačańnie» — televizijny prajekt, pieramoha ŭ jakim abumoŭlena sumaj układzienych srodkaŭ, patencyjałam ludziej, jakija padtrymlivajuć udzielnika, i vobrazam, stylem, jaki stvaraje tvorčaja hrupa», — skazaŭ Alaksandr Sidarenka.
Jon padkreśliŭ, što ŭdzieł pieramožcy mižnarodnaha piesiennaha konkursu «Jeŭrabačańnie-2014» Kančyty Vurst u mierapryjemstvach «Słavianskaha bazaru» nie płanujecca, ale sama tradycyja zaprašać na viciebski fiestyval udzielnikaŭ «Jeŭrabačańnia» budzie zachavanaja.
Na «Słavianski bazar» u hetym hodzie pryjeduć pieramožcy i ŭdzielniki minułych hadoŭ, jakija vystupiać u kancercie «Zorki Jeŭropy» (u noč z 11 na 12 lipienia), a taksama prymuć udzieł u inšych kancertach forumu. Miarkujecca, što ŭ Viciebsku vystupiać Tea, Emili de Forest, Doni Monteł, Alaksandr Rybak, Alona Łanskaja i pradstaŭniki na «Jeŭrabačańni» ad Ukrainy i Rasii.