Miaśnikovič: Tradycyjnaja madel raźvićcia pramysłovaści siabie vyčarpała
Ab nieabchodnaści pryniaćcia «rašučych mier pa azdaraŭleńni i hłybokaj restrukturyzacyi pramysłovaha kompleksu» zajaviŭ siońnia na pasiadžeńni Savieta ministraŭ Biełarusi premjer-ministr Michaił Miaśnikovič.
BiełTA
«Vyniki minułaha hoda i čatyroch miesiacaŭ hetaha śviedčać ab tym, što tradycyjnaja madel raźvićcia pramysłovaha kompleksu vyčarpała siabie».
Jak adznačyŭ Miaśnikovič, kali ŭ budaŭnictvie, APK i ŽKH stvorany mižviedamasnyja hrupy, jakija raspracoŭvajuć miery pa ŭdaskanaleńni dziejnaści hetych halin, to ŭ pramysłovaści — viadučaj halinie krainy — takoha niama, choć situacyja tut bolš składanaja.
«Minpram imkliva stračvaje pazicyi: jaho dola ŭ ahulnym abjomie pramysłovaj vytvorčaści źnižajecca.
Za try piacihodki jana skaraciłasia na 5,5 pracentnaha punkta (z 20,3% da 14,8%), za čatyry miesiaca hetaha hoda ŭpała jašče na 2 pracentnyja punkty — da 12,8%», — skazaŭ Miaśnikovič.
Akramia taho, dadaŭ jon, dola pradpryjemstvaŭ Minprama ŭ ahulnym abjomie pramvytvorčaści zraŭniałasia z dolaj pramysłovych pradpryjemstvaŭ sistemy Ministerstva sielskaj haspadarki i charčavańnia.
Nieabchodna «terminovaje kompleksnaje vypraŭleńnie situacyi», zajaviŭ kiraŭnik urada i daručyŭ svajmu pieršamu namieśniku Uładzimiru Siamašku arhanizavać adpaviednuju pracu.
Kanceptualnyja padychody pa vyrašeńni prablem u pramysłovaści pavinny być razhledžanyja prezidyumam Saŭmina nie paźniej za červień i ŭličanyja ŭ płanach na 2015 hod.
Pavodle słoŭ Miaśnikoviča, najpierš nieabchodna źviarnuć uvahu na ŭdaskanaleńnie sistemy kiravańnia i źnižeńnie zatrat. «Chołdynhi, na jakija rabili staŭku, realna pakul jašče nie pačali pracavać», — pryznaŭ premjer. Pryčynaj tamu, pavodle jaho mierkavańnia, źjaŭlajecca niapravilny padychod da ich stvareńnia: časta havorka idzie tolki pra miechaničnaje abjadnańnie niekalkich pradpryjemstvaŭ.
Miaśnikovič paviedamiŭ, što ŭrad užo ŭnios na razhlad kiraŭnika dziaržavy prajekt ukaza, jaki praduhledžvaje značnyja źmianieńni va ŭmovach funkcyjanavańnia chołdynhaŭ.
Premjer paprasiŭ kiraŭnictva Administracyi prezidenta akazać sadziejničańnie ŭ pryniaćci hetaha dakumienta. U pryvatnaści, jak ličyć Miaśnikovič, «z 1 studzienia 2015 hoda treba ŭkaranić u chołdynhach pryncyp kansalidavanaha płacielščyka — vyzvalić unutranyja abaroty ad padatkaŭ».
«Savietu ministraŭ patrabujecca pryniaćcie apieratyŭnych i sistemnych mier, kab rasšyvać vuzkija miescy ŭ ekanamičnym raźvićci. Pakul urad tak pracavać nie moža. Pa šmatlikich vidavočnych pytańniach rašeńni nie prymajucca davoli doŭha, usio hraźnie va ŭzhadnieńniach, sumnieńniach», — kanstatavaŭ premjer-ministr i zaklikaŭ urad bolš apieratyŭna vyrašać pytańni ekanamičnaha charaktaru.